Jurip u Commissioner & Secretary, C&RD Shillong ïa ka shnong Tuber Kmaishnong, kular kyntiew ïa ka kam jngohkai pyrthei

Khliehriat naiwieng 12: U Commissioner & Secretary, Community & Rural Department, Shillong, u bah Frederick Roy Kharkhongor, IAS, lem bad kiwei kiwei ki heh sorkar hynnin ka sngi saitjaiñ ki la leit ban jurip ïa ka shnong Tuber Kmaishnong, East Jaiñtia Hills District, u la ai ka jingiaroh ïa ka jingitynnad ka shnong ka thaw kaba kup rong jyrngam, u kular ruh ban iarap ban kyntiew shuh shuh ïa kane ka shnong.
U bah Fedrick Kharkongor, u la jurip ruh ïa kawei ka shlem ai jinghikai ( Vocational Training Centre), ka Kasturba kaba la seng nongrim naduh ka 3 tarik u nailar 1957, ka shlem ai jinghikai kaba la rim bha kaba dang treikam haduh mynta, utei u heh sorkar u la kular ban iarap kyrpang ïa kane ka centre ban kyntiew shuh shuh ïa kane ka shlem ai jinghikai.
U la ai ruh ka jingiaroh halor ka jingiytnnad bad ka jinglah ka shnong ban pynneh pynsah ïa ki matti u men ba rim kiba naduh ki khlaw ki btap, ki lum ki wah, ki maybynna, ka krem Pam bru, kiba dei ki matti u barim kiba don ki khanatang, kine ki dei ruh ki jaka ba kiba ju khring ïa ki nongwan jngohkai pyrthei lane ki torist spot kiba don ha shnong Tuber Kmaishnong bad ka jaka ba kyrpang ba pynneh pynsah ïa ki dohkha bad ki doh um ba la tip kum ka Spaiñ Fish Sanctuary.
Kum ban shu bynrap, ha Tuber Kmaishnong ka don ruh kawei ka khlaw kyntang kaba heh bad ba ïar, kaba hapoh ka jingpeit jong ka Seiñ Raij Tuber, kaba ki ju leh ïa ki kñia ki khriam, hapoh kane ka khlaw ki don ki maw bynna, ki maw shongthait ne ki maw kor, ki maw shong dorbar ba ju pynlong dorbar ki men ba rim, ha kane ka khlaw, ki don ruh ki dieng ki siej, ki syntiew, ki mrad ba bun jait, hajan kane ka khlaw ka don ruh ka jaka shongkai pyngnad, ka Snieriang Eco Park kaba paw bha ha East Jaiñtia Hills District kaba ki nongjngohkai pyrthei na kylleng ki ju wankai sha kane ka jaka.
Na ka liang u Rangbah shnong jong ka Tuber Kmaishnong, u bah Miki Lyngdoh, u ai ka jingkhublei ba kyrpang ïa u Commissioner & Secretary, C&RD Shillong, uba la wan ban ïuh kjat ha shnong, u ai ruh ka jingkhublei sngewnguh halor ka jingkular jong u ban iarap lem ïa ka shnong ban kyntiew ïa ka kam jngohkai pyrthei bad ruh ban kyntiew ïa ka shlem ai jinghikai, ka Kasturba Gram Seva, u la iathuh ruh ba kaba kum kane ka shlem ai jinghikai ka don tang saw tylli hapoh ka jylla Meghalaya bad ka shnong Tuber Kmaishnong ka dei kawei na ki shnong kaba la ioh ïa kane ka Vocational Training Centre kaba naduh u snem 1957, kata shiphew snem hadien ka jingioh jinglaitluid ka ri India.
U Rangbah Shnong, u la ai khublei ruh ïa ki heh sorkar kiba la wan lang ha katei ka sngi, u ai khublei ruh ïa ki paidbah nongshong shnong kiba ju ïa don ryngkat bad ka shnong ha kino kino ki kam bad ong ruh ba lyngba ka jingiatreilang bad ki nong shong shnong yn lah ban wanrah ïa ka roi ka kiew hapoh shnong.
Kiba la ïa don ryngkat lang ha kane ka jing jurip ki kynthup ruh u Deputy Commissioner ba rim jong ka East Jaiñtia Hills District, u bah M.Lhuid, ka District Project Manager MGNREGA, DRDA Khliehriat, ka kong Sanda Sutnga, u Block Development Officer, Khliehriat, u Dr Tammiyaki Shylla, General Secretary shnong Tuber Kmaishnong, u bah Tell Me True Phawa, Assistant Secretary, u bah Ksohlang Phawa, Secretary VEC, ka kong Reality Dkhar, Treasurer, bah Samlang Rynglhlem lem bad ki nongshong shnong.