La jan kot shi snem naduh ba plie, ym pat long pyndonkam ka skul Sib Sing ïa ka building thymmai
Nongstoiñ, Naiwieng 12: Naduh u Kyllalyngkot jong u snem ba la lah, ïa ka building ba thymmai jong ka Sib Singh Memorial Government Higher Secondary School, la dep ban plie da u myntri rangbah ka Jylla u Conrad Sangma, hynrei ka long kaei kaei kaba lyngngoh ngaiñ sha baroh ba haduh mynta ym shym la lah satia ban pyndonkam.
Ha ka jingleit jurip ïa kane ka skul building ba thymmai, la lap ba ki katto katne ki kam kiba dang sah ki long ym pat ring bording jingshai, ym pat don ka um bad ki katto katne ki jingdonkam barit baria. La lap ruh ba ha ka bynta kaba shajrong jong katei ka building thymmai, ki briew ki ïoh ban leit rung laitluid khlem jingwit. Lada dang slem ban pyndonkam ïa ka, ka lah ban kylla pynban sha ka ktem leh sniew aïu re aïu.
Ha ka jingïakren bad ka kong D.Hoojon Principal ka Sibsingh Memorial Government Higher Secondary School, ka la kren shai ba ïa katei ka building thymmai kat haduh mynta mynne ym pat ïoh lad satia ban pyndonkam, namar u contractor um pat aiti sha ka skul wat tang ïa u shabi ruh. Nalorkata ïa ka daw balei bym pat aiti ruh, ym don jingtip ei ei ong katei ka Principal.
Kumba ka long haduh mynta, ki khynnah kane ka skul ki dang hap ban shong klas ha ka building kaba rim, ha kaba ka jinglong jingman jong ka building kam long shuh. Naduh ki jingkhang bad jingkhang ïit ym I ïahap shuh bad ka long ruh ka jinglehraiñ ba ka skul sorkar kaba pawnam bad rim tam ha ka dong ka thaiñ West Khasi Hills, kan kup sah ïa kane ka dur kumba ka long mynta.
Kumban shu pynkynmaw hangne ba ka skul Sib Singh kaba don ha Nongpyndeng Nongstoiñ West Khasi Hills District, haduh mynta u snem 2023 ka la kot sha ki 46 snem kynthih namar la seng ïa ka naduh u snem 1976. Naduh ba la seng ïa ka haduh kine ki snem kiba la dep, kam pat ju ïoh kano kano ka jingïarap ne ka scheme kaba heh na ka sorkar jylla Meghalaya.
Ki snem ki la tyllun na uwei u snem sha uwei pat hynrei dei tad ynda ka la kynjoh sha ki 46 snem, kata ha u snem 2023, katei ka skul ka la ïoh ban pynïeng da kawei ka ïing paka kaba thymmai kaba la kot sha ki 4 klur tam.
Ïa katei ka building thymmai la ïoh ruh ban plie paidbah ha ka 17 tarik u Kyllalyngkot 2023 da u Conrad K.Sangma myntri rangbah ka jylla Meghalaya. Hynrei, na ka bynta kiba bun ba lang ki sah ha ka lyngngoh bad buh kylli balei don aiu sha lyndet bym pat long pyndonkam.