Nongpoh, Naiwieng 12: Kum ka jingpynshlur bad ka jingai mynsiem ïa ki samla ba pass bha ha ka SSLC bad HSSLC jong u snem 2023 na Ri Bhoi District, ka Ri Bhoi Youth Federation (RBYF) ha ka sngi Saitjaiñ ka la lah ban pynkup burom haduh 26 ngut ki samla pule kiba la pas bha na Ri Bhoi District.
Ïa kane ka jingpynkup burom la pynlong ha District Library Auditorium Hall, Nongpoh, ha kaba u MP ka Shillong, u Ma Vincent H. Pala u la wan ban pynkup burom ïa ki samla pule kum u kongsan bad la sakhi lang ruh da ka jingdon lang u MLA ka Nongpoh, u Bah Mayral Born Syiem, u MLA ka Umroi, u bah Damanbaitbah Lamare, u MLA ka Umsning, u Dr. Celestine Lyngdoh, u President ba rangbah ka RBYF, u bah Bipul Thangkhiew lem bad kiwei kiwei ki dkhot bad ki riew rangbah ka Ri Bhoi District.
Kum ban pynkynmaw, ka Ri Bhoi Youth Federation ka dei kawei na ka seng kaba ju shakri kyrpang ym tang na ka bynta ka bha ka miat bad ka roi ka par jong ki paidbah ha Ri Bhoi, hynrei kane ka seng man la u snem ka ju pynlong ïa kane ka jingpynkup burom ïaki samla ba pass shi bynta ka thong jong ka seng ka long ban pynmih shibun ki samla kiba la bit la biang ha ka kyrdan pule na ka bynta ba kin long pat kita ki nongkitkhlieh ban ïa kit ïa bah lang ïa ka eh ka shon jong ki paidbah ha Ri Bhoi District.
Kum ka seng trai na Ri Bhoi, shuwa ban pynlong ïa kane ka jingpynkup burom ïa ki samla la rwai ruh ïa ka Anthem jong ka Ri Bhoi, kaba long shi bynta ban kynmaw burom ïa ki nongïalam ba leit noh kiba la kit ïa kata ka lyngkor ban kyntiew ïa ka Ri Bhoi ha baroh ki liang.
U President ka RBYF, u Bah Bipul Thangkhiew, haba kren ha kane ka sngi u la kren halor shibun ki bynta jong ka jingïaid lynti ka seng ban shakri kyrpang ïa ka them Ri Bhoi bad ha kane ka sngi u la pynpaw ruh ba ka daw kaba kongsan ba ka seng ka ju pynkup burom ïa ki samla pule ka dei namar ba ka don ka jingangnud ban pynmih shibun ki khlur na kane ka dong bad ka thain ba kin shim ïa kata ka lyngkor kumno ban kyntiew ïa ka Ri Bhoi District khamtam bad ïa ka jylla hi baroh kawei.
Haba ai jingkren ruh ha kane ka sngi, naduh u MP ka Shillong, u Ma Vicent H. Pala bad ki MLA ki la ai ka jingïaroh ïa ka RBYF kaba la shim ïa kane ka bynta ban ai mynsiem ïa ki khun samla bad ki ai ruh ka jingkyrkhu kyrdoh ïa kane ka seng ba kan dang kiew shaphrang na ka bynta ban dang ai ka jingshakri kaba bha tam ïa ki paidbah ka District bad ka jylla hi baroh kawei.
La pynkut ruh ïa kane ka jingpynkup burom da kaba sam ïa ki syrnot bad ki khusnam pisa sha kitei ki samla ba la sam da u kongsan, u Ma Vicent H. Pala ryngkat ka jingïarap sam ki MLA bad ki nongïalam ka RBYF bad ki riew rangbah jong ka dong Ri Bhoi.
