Khliehriat, Naiwieng 12: Ka Khasi Students’ Union (KSU) San Shnong Unit kala pyntip ba kan pynlong ïa ka jingsam khusnam ïa ki samla pule kiba wan shakhmat ha ki Exam bapher bapher ka ban long haka 18 tarik u Naiwieng, 2023 ïa kaba la tip kum ka ‘3rd Maitchaphrang Award Academy”.
Kine ki san shnong ki kynthup naduh ka Pynthorsale, Mukhaialong, Mutong, Cham Cham bad ka Lumshyrmit kiba dang hap hapoh ka East Jaiñtia Hills District.
Ïa kane ka jingsam khusnam yn pynlong ha Dorbar Hall jong ka Shnong Mukhaialong naduh ka por 11 baje shiteng mynstep ha kaba ki nongïalam ba hakhmat jong ka seng kin don lang ha ryngkat ki riew rangbah jong kitei ki San Shnong.
Haka juh ka sngi ka seng ka pynbam smai ïa ki nongkitkam ba thymmai jong ka KSU San Shnong Unit na ka bynta ka snem 2023-2026.
Halor kane ka seng ka kyrpad ïa baroh ki samla pule kiba wan shakhmat ba ki pynpoi kloi ïa ki kot donkam jong ki (mark sheet) sha ki nongkitkam ka Seng hashwa jong katei ka tarik, pynkut ka kyrwoh na u Publicity Secretary samla Iahphang Dkhar.
