Jowai, Naiwieng 11: U samla Nangbha Rymbai na ka shnong Panaliar, Jowai, West Jaiñtia Hills District, ula long u lahduh ha ka jingïakop online kaba la tip kum ka “KHASI TRADITIONAL SHOW ONLINE 2023” kaba la pynlong da ka kynhun KHASI INDIGENIOUS FOUNDATION naduh ki tarik 10 haduh 25 u October 2023.
Ka samla ba wan ba ar ha kane ka jingïakhun ka dei ka samla Melisha Shylla naka shnong Umsiang Mawpdeng, Ri Bhoi District. Kaba wan ba lai pat ka dei ka samla Dawanrihun Lyngdoh Mawlong na ka shnong Diengsiar, East Khasi Hills District.
Kane ka jingïakop (show) ba ka Khasi Indigenous Foundation ka la pynlong ka long kum shi bynta ban pynsah pyneh ïa ka dustur ka riti jong u Paid Khasi baiar, ïa ki khusnam sha ki nong jop ryngkat ka song pisa la dep ban sam sha ki nong jop da ki Dicretor jong ka Foundation ba kynthup ïa u bah Precious Stone Sumer, Niman N Shadap, Seaspiar Tangliang bad u bah Pyniolad Kyndiah.
Haba ai jingkren na u samla Niman N Shadap, Dicretor Khasi Indegenious foundation ha ka sngi ba sam ïa ki khusnam, u la kyrpad bad kyntu jur ïa ki khun samla kynthei bad shynrang ba kin mih shakhmat ban ïashim bynta ha kino kino ki Rynsan kiba pyn-i nam ïa ki Riam tynrai jong u khun Khasi Khara, khnang ba ka riam tynrai jong kan paw ha khmat ka pyrthei, bad ym dei ban klet ia ki riam tynrai la jong lada don hangno hangno ruh.
Shuh shuh u ong ba ki nong jop kim dei ban sngew sarong lane khyllew hynrei ki dei ban long ka nuksa babha sha kiwei pat khnang ba ki wei kin bun ïa ka dienkjat jong ki. Ki dei ruh ban dang trei shitom shuh shuh nangne sha khmat, bad kito ki bym poi sha ka thong ruh kim dei ban duh jingkyrmen hynrei kin dang ïai trei shitom shuh shuh namar ka Khasi Indegenious Foundation kan sa pynlong ïa ki programme bapher bapher nangne sha khmat. Khatduh eh dei ban don ka mynsiem ïa ieid iwei ïa iwei kum shipara khnang ba ka jaitbynriew kan kiew irat ha baroh ki liang.
