Nongstoiñ, Naiwieng 12: Ka Mawshnyrut Block ka dei ka Block ba ka jing bun briew bad ka jingdon jong ki shnong ka kiew sted bha ha kine ki khyndiat snem haba nujor bad kiwei pat ki Block ha West Khasi Hills.
Ka jingheh jong ka area jong ka Mawshynrut block ka don kumba 1614 Square Kilomitar bad ka jingdon jong ki shnong ka long 337 tylli.
Haba phai pat sha ka jingbun briew kat kum khana samari jong u snem 2011 ka don baroh 98,327 ngut bad lada kheiñ ïa ka jingdon jong ki nongshong shnong ka long ba ka jingdon jong ki nongshong shnong ka la kot sha ka 46.15 ngut ha ka shi square kilomitar.
Katkum ki jingtip ba la ïohlum ha kine ki sngi, la ong ba ki skul hapoh Mawshynrut Block ki don kumba 482 tylli, ba kynthup ïa 348 tylli ki Lower Primary, 104 tylli ki Upper Primary, 24 tylli ki Secondary, 5 tylli ki Higher Secondary bad kawei ka College.
Nalor kata katkum ka jingkheiñ ba la ïoh ban lum, la lap ba ka jingkiew jong ka Literacy rate hapoh ka Mashynrut Block ka la poi sha ka 57.26 %. Ki paitbah nongshong shnong jong ka Mawshynrut Block, ki dei ki briew kiba ïabeh bha ïa ka jingpule bad kiba da thrang shisha ban poi sha ki kyrdan kiba shajrong.
Ka jingdon jong kiba duna ha ki dkhot met hapoh Mawshynrut Block ki don baroh 591 ba kynthup ïa 326 ngut ki kynthei bad 267 ngut ki shynrang. Napdeng kitei kiba duna dkhot met, 279 ngut ki dei kiba hapoh 20 snem ka karta ba kynthup ïa 159 ngut ki shyrang bad 120 ngut ki kynthei.
Napdeng kitei kiba don jingduna ha ki dkhot met kiba la don ïa ki syrnot jingpynshisha na ki Doktor ki long 280 ngut ba kynthup ïa 155 ngut ki shynrang bad 125 ngut ki kynthei. Ki bym pat don ïa ki syrnot jingpynshai sha na ki doctor pat ki don 313 ba kynthup ïa ki 171 ki shynrang bad 142 ki kynthei.
Nalor kata kiwei pat kiba duna dklhot met kiba ha ka karta kaba 20 snem sha jrong kiba la don ïa ki syrnod jingpynshisha na ki Doktor ki don 121 ngut ba kynthup ïa ki 69 ngut ki shynrang bad 52 ngut ki kynthei. Ki bym pat ïoh ïa ki syrnot na ki doctor pat ki don 158 ba kynthup ïa ki 90 ngut ki shynrang bad 68 ngut ki kynthei.
