Pynlong ka Seng Samla Wahingdoh da ka jingsam khusnam “29th Educational Award 2023”

Shillong, Naiwieng : Ka Seng SamlaWahingdoh, Shillong ka la pynlong ïa ka jingsam khusnam ba la tip kum ka “29 th Educational Award” ha 10 tarik Naiwieng 2023 hapoh Community Hall, ha kaba ki la don baroh 31 ngut ki khynnah kiba pass bha ha ki kyrdan jingpule bapher bapher.
USamla Banraplang B. Tron u la poi ha ka kyrdan kaba 6 ha ka BSc Biotechnology, bad u Samla Hubert Well Thabah ula wan ha ka kyrdan ba10 ha ka BSc, Environmental Science.
Kum ban pynshlur bad ai mynsiem shuh shuh ia ki khynnah skul na ka liang ka SynjukWahingdoh Secondary School bad ka Seng SamlaWahingdoh ki la pynkup burom ruh ïa ki khynnah kiba la pass ïa ka SSLC, 2023.
Ha kane ka prokram la ïa don lang ruh ka Dr. M. Ampareen Lyngdoh, Myntri ka Tnat ka koit ka khiah ka sorkar jylla kum ka Kongsan kaba la ai ruh ïa ki jingkren kyntu kynpham bad aimynsiem ha ka liang ka pule puthi kumjuh ban kyntiew ïa ka imlang ka sahlang hi baroh kawei.
Nalor kata la ïoh ruh ïa ki jingkren sneng bad kyntu kynpham na u Rangbah Shnong I Babu R. S.Marbaniang bad u Bah Pynshngain N Syiem, MDC Mawkhar, Pynthorumkhrah Constituency kiba long ki Symbud Kongsan ha kane ka sngi.
Ha kane ka sngi la sam khusnam ruh sha ki khynnah kiba ioh heh marks tam ha ki subject bapher bapher ha ka kyrteng jong ki katto katne ngut ki nongshong shnong kiba la noh synniang borbah ha ka imlang sahlang ha shnong ha thaw.
Ha kaba sdang ïa ka jingïalang la ïoh ïa ki kyntien pdiang sngewbha na u President jong ka Seng u Bah Anthony E.S Lyngdoh bad lah ïoh ban pynsngew da I Miss Marcelia Born Syiemliehia ïa ka history ba kumno la sdang ïia ‘Educational Awards’ naduh u Snem 1992.
Nalor kata la ïoh ruh ka jingkren ai Mynsiem na i Miss Fedilia M. Shabong, Principal, Seng khasi H.S School, Jaiaw bad ka jingkren ai khublei na u General Secretary jong ka Seng Samla u Wanhunlang Suting.