Buh jingkylli ka HYC ba kuman ka sorkar ïa ka jingdawa ki ASHA

Shillong, Naiwieng 12 : Ka Hynñiewtrep Youths’ Council- CEC hapoh ka jingïalam jong u President ba thymmai, Bah Roykupar Synrem ka la pynpaw ba kim lah satia ban pdiang ïa ka jingkuman bad ka jingbymlah jong ka sorkar ban pynbeit ïa ki jingeh bad jingdawa ba shong nongrim jong ki Nongtrei ASHA ha kane ka Jylla ka jong ngi.
“Na ka liang ka Seng ka dawa ba ka Sorkar ka dei ban thaw ki lad ki lynti ban pynurlong ïa ki jingdawa jong ki ASHA ban ïoh ïa ka jingsiew kaba biang katkum ka kam ba ki trei, ban kynthup ïa ki hapoh ka MHIS na bynta ban ïoh jingsumar ei bad kiwei kiwei ki jingdawa jong ki,” ong u President ha ka kyrwoh.
Nalorkata, u ong ruh ba kum ka seng ka ai ka jingkyrshan ïa ka synjuk jong ki ASHA hapoh ka lama jong ka MAWU kiba don mynta ha ka jingïakhih ban dawa ïa la ka hok. “Ngim lah ruh khlem da ai khublei bad sngewnguh ïa ki ASHA halor ka jinglenlade jong ki ha ki jylli treikam kaba ki don khamtam eh ngim dei ban klet kumno ba ki len lade ha ka por ba ngi mad ïa ka khlam CoVid-19. Dei ma ki kiba long kita ki nongtur ba hakhmat ban ïakhun pyrshah ïa kane ka khlam,” bynrap biang ka kyrwoh.
Kumta, u la ong ba kum ki nongshong shnong ki sngewdap ram ïa ka jingshakri bad ka jinglen lade jong ki bad kumta kum ka seng ka kyntu ïa ka Jaidbynriew, ki Dorbar Shnong bad baroh ban ai ka jingkyrshan lang ïa ki ASHA ha kane ka jingïakhih jong ki.
Ha kajuh ka por, ka Seng ka kyntu ïa ka sorkar ba kan pynbeit noh kham kloi ïa kane ka kam namar ka jingshah ktah kan dei ïa ki nongshong shnong lada ki ASHA ki bteng ïa ka jingïakhih.
“ Ngi kyntu ruh ïa ka Sorkar ba kam dei ban pyntieng pynsmiej ïa ki Nongtrei ASHA ba kin shah weng kam lada kim sangeh ka jingïakhih namar lada ka Sorkar ka bakla ban shim rai bad weng kam ïa ki ASHA kiba ïakhih ban dawa ïa la ka hok, na ka liang ka Seng ruh kam banse ban mih shakhmat bad ïakhih pyrshah ïa ka Sorkar Jylla,” la pynkut ka kyrwoh na ka seng.