Shillong, Nailar 05: Ka kynhun ki thei phutbol ka Meghalaya ka la wanphai nadien ban pynliem ïa ka Madhya Pradesh da 2-1 ha ka jingïakhun ba khadduh na ka Group D jong ka lympung Junior Girls’ National Football Championship (Tier 2) ha Belgaum, Karnataka, hynne ka Lah Sngi U Blei.
Haba phai sha ka jingïakhun, ka Madhya Pradesh ka la ïoh ban lamkhmat nyngkong lyngba ka kol na ka Lalita ha ka 26 minit.
Kane ka shi kol ka la ïeng skhem kumba shi kynta shuwa ba ka Bonifilia Shullai jong ka Meghalaya kan ïoh pynphai ha ka 84 minit, kane ka kol ka la ai mynsiem ïa ka kynhun ha kaba ka la ïoh ruh ban pynkyndit ïa ka liang pyrshah da kaba thep ïa ka kol kaba ar lyngba ka Eiladki Ksoo (90’+3) shuwa ban kut artad ka por.
Da kane, ka Meghalaya ka la pyndep ïalade ha ka kyrdan ba ar na ka Group D da 3 point hadien ba shah rem ha ka Sikkim ha ka Sngi Saitjaiñ. Kumban shu pynkynmaw, ki la don tang lai tylli ki kynhun ba ïakhun na kane ka Group hadien ba ka Sports Authority of India ka la weng noh ïalade shuwa ban sdang ka wat ïakhun.
Katkum ki kyndon jong kane ka lympung, tang ki kynhun ba poi kyrdan ba hakhmat duh ki lah ban ïohrung sha ka wat ïakhun semifinal. Ka Sikkim kaba la pynliem ïa ka MP ha ka Sngi Palei, kaba mut, ka jingjop ïa ka Meghalaya, ka la pynthikna ïa kane ka kynhun ban ïohrung sha ka Semi final.
Ki thei ïalehkai kiba la mih madan ïa ka Meghalaya hynne ka sngi:
Shishameri L Peinlang (GK) ( Zephania L Marshilong 77′), Saphapaia Lyngdoh, Ibadarihun Nongsiej, Ibashembha Khongsit, Blessiful Thongni (sub Ba-inangsan Langbnang 28′), Bonifilia Shullai, Alisha Lyngdoh, Balabet Khongsit (sub Eightfulness Shangdiar 36′), Larihun Songthiang (sub Deigracia Dan 77′), Judith Kharmuti, Eiladki Ksoo
