Shillong, Nailar 05: Ka FC Goa ka la sdang ïa ka jingïaid lynti ha kane ka 133rd IndianOil Durand Cup da ka namjop pyrshah ïa ka Rangdajied United FC ha ka jingïalehkai kaba itynnat bha na ka Group F kaba la long ha Jawaharlal Nehru Stadium, Shillong.
Ha kane ka jingïalehkai ka Rangdajied United FC, ka kynhun kaba dang shu shah kynthup shen ha ka Durand Cup, watla kam shym la jop hynrei ka la lah ban wanrah ïa ka jingïakhun kaba itynnat tam bad kaba jwat pyrshah ïa kane ka kynhun ISL- ka FC Goa, ha kaba ka la shah rem salit da 4-3 kol.
U Leander D’Cunha (48′), Devendra Murgaokar (58′), Lalthangliana (79′) bad u Vellington (90+6′) ki la pynkhihjar na bynta ka FC Goa katba u Owanijuh Pajuh (19′), nangta ar tylli ki kol ba itynnat na u Pynbha (61′), Apbor (85) ki la pynkhihjar na bynta ka Rangdajied, hynrei kam shym la biang ïa ka kynhun ban lait na ka namrem.
Haba jam sha kane ka jingïakhun, ka Rangdajied United FC hapoh ka jingïalam jong u AibanjopShadap kum u Head Coach ka la ïalehkai 4 ngut ba kyrshan dien, 3 ngut hapdeng bad 3 ngut kiba tur khmat.
Namar ka jingjur u slap, ka madan ka long kaba syntuid. Hynrei watla kata ruh, baroh arliang ki la lah ban ïalehkai bha. Ka Rangdajied United ka la pynshongshit da kaba lamkhmat ïa ka jingïalehkai ha ka minit ba 19 jong ka kylla step kaba la pynkyndit ïa ka Goa. Kane ka kol ka la jia hadien ba u bak ka Goa u la syntuid katba dang pyrshang ban pyllait ïa ka bol napoh phyllaw kol ha kaba ka RUFC lyngba u Pajuh u la shim ïa ka kabu ban pynkhihjar.
Lah ban kdew ba baroh arliang ki long kiba ïa ryngkatbor bad ka RUFC ka la seisoh bha ha ka ban pashat bad pynrung bol khlem ka jingeh hapoh phyllaw kol ka liang pyrshah bad kane ka la ailad ïa ki ban tehlakam ïa ka jingïakhun.
Ka FC Goa ka la ïoh ïa ka kabu ksiar kaba nyngkong hynrei kim shym la lah satia ban pynurlong ha kaba ka bol ka la lait sharud. U Aenam jong ka Rangdajied, u la u la ïai bteng ban long ka jingma ïa ka liang pyrshah (FC Goa) kaba hap ban ïada bun ngut ban khanglad ïa u.
Haba sdang ïa ka kylla kaba ar, ka Goa ka la ïoh ïa ka penalty hadien ba u player jong ka u la shah pynur ha u rangapkol ka RUFC. ïa kane ka penalty la shut da u Leander D’Cunha, watla u rangapkol ka RUFC u la ïoh ban ïada hynrei u Leander u la mareh pynstet ban thep ïa ka bol shapoh kol.
Ka Goa ka la wanphai ban lamkhmat ïa ka jingïakhun lyngba u Devendra. Hynrei tang hadien 2 minit ba shah thep ka Rangdajied ka la pynphai. Lyngba ka throw-in kaba la poi kjat jong u Pynbha shuwa ba un shut ïa ka bol kaba la rung jlang na sdong kol.
Ka Goa sa shi sien ka la ïoh ban lamkhmat ïa ka jingïalehkai hadien ka jingbakla u player ka RUFC da kaba kum pyndei da ka kti ïa ka bol hapoh phyllaw kol. U Lalthangliana u la shim ïa kane ka bynta bad khlem da pynsepei u la pynrung ïa ka bol ban buh hajkhmat ïa ka kynhun. Hynrei, ka RUFC ka la pynïakhaid biang sa shisien lyngba u Apbor.
Ka jingïakhun kam shym la kut hangne ha kaba ka FC Goa ka la ïoh ban thep ïa ka kol kaba khadduh shuwa ban kut ka por ban khur ïa ka jingjop. Kane ka la wan lynga ka jingtrei shitom jong u Likson u ba la ïoh ban rah ïa ka bol shuwa ba u Vellington un pynkhih suk ïa ka bol shapoh kol ban khur ïa ki lai point ba kongsan.
