Khliehriat, Risaw 25: Ka lympung ïalehkai phutbol jong ka kyrdan First Division bala pynïaid da ka East Jaiñtia Hills District Football Association kaba la long ha ka sngi Thohdieng 25 tarik u Risaw ha madan Artificial Turf, Diengshynrum, Khliehriat.
Haba phai sha ka jingïakhun ba nyngkong, la sakhi ïa ka kynhun ïalehkai jong ka Wahiajer Narpuh YSSC kaba la pynjemkhnap ïa ka Khliehriat West FC hadien ba ka la jop 7-1 kol.
U Santosh Taron u la long u namtam na bynta ka Wahiajer Narpuh hadien ba u la khyrwit syndon da ka hattrick (26, 37 bad 41 minit). Kiwei dei ki kol la pynkhih da u Paila Mukhim (49’), u Den Mukhim (80’), u Bantei Sumer (85’) bad u Any Manner (88’). Ïa ka shikol na bynta ka Khliehriat West FC la thep da u Silgrak Pala haka minit ba 78.
Haba phai pat sha ka jingïakhun kaba ar hapdeng ka Diengshynrum SC pyrshah ïa ka Byndihati CSC kila poi sha ka jingïakhaid khlem da don kiba ïoh ban thep kol (0-0).
Ka jingïakhun ha kane ka sngi 26 tarik u Risaw kan long hapdeng ka Bataw YWSC pyrshah ïa ka Lumshken SC ha ka por 12 baje mynsngi, katba ka Tpepswer SSWO kan ïakhun pyrshah ïa ka R. Wahshnong SC ha ka por 2 shiteng nohphai sngi.
