Jop ka South Garo Hills-DCA bad ka Shillong Cricket Association

Shillong, Nailur 11: Ki thei ïalehkai South Garo Hills District Cricket Association bad ka Shillong Cricket Association ki la ïoh ban khur ïa ka namjop ha ka jingïakhun ka jong ki jong ka lympung Meghalaya Cricket Association’s U-19 Girls Inter District Cricket Tournament kaba la long hynne ka Lah Sngi U Blei.
Ka Jayshree Singh jong ka Shillong Cricket Association ka la ïoh ban kamai ïa ka spah ron khem shah pynhap (105 not out), kaba la long ka jingkyrshan ba radbah ïna bynta ka kynhun ban pynliem ïa ka West Jaintia Hills DCA haduh 149 ron ha ka jintgïakhun kaba la pynlong ha madan Umbuda kaba ha Ri-Bhoi, na ka Group B.
Katba ki thei ka South Garo Hills-DCA ka la khur ïa ka namjop da 8-wicket pyrshah ïa ka North Garo Hills DCA ha ka jingïalehkai kaba la long ha Salpara na ka thup Zone 2.
Khlem ka Jayshree, ka SCA kan jin da la mad ïa ka namrem ha kane ka jingïakhun namar ka ron kaba hehduh lait na ka, ka long 14 ron, hynrei ka jinglah jong ka ban kamai ron na ka bynta ka kynhun kaba la wan lyngba ki 123 bol, ka la wanrah ïa ka jingkylla ha kane ka jingïakhun.
Haba mih madan ha ka palai nombar ba 3 hadien ba ka SCA ka la jop ïa ka toss bad jied ban tied nyngkong, ka la khyrwit haduh 17 tylli ki four ban ïarap ïa ka Shillong CA ban buh ïa ka thong da 227 shah pynhap da 5 wicket haduh kaba kut jong ka 29 over, bad ka run rate ka long da 7.83 man ka over.
Dei tang ka Sawakahi Syngkon (2/44) kaba la lah ban lehkaibha napdeng ki thei kawangbol jong ka WJH, katba ka Yoolang Suting (1/39) bad ka Doliza Lyngdoh (1/49) ki la ïoh ban khur mar shi wicket ha kane ka jingïalehkai.
Haba beh ïa kane ka ron ba la buh, ki thei ka WJH kim shym la ïohlad satia ha kaba ki la shah pynhap lut baroh tang hadien ba kynjoh sha ka 78 ron na ki 23.3 over. Ka Mercia Able Dhar marwei ka la kynjoh sha ka phew ron (11 ron) hynrei ka jingmaïan jong ki nongkawangbol ka SCA ka long ar shah – ha kaba ka Natasha Rabha ka la khur 4/20, ka Monica Singh 3/7 bad ka Jennyfer Fancon 2/17.
Haba phaie sha kawei pat ka jingïalehkai, ka NGH ka la jied ban tied nyngkong hadien ba jop ïa ka toss hynrei phewse ki la kynjoh tang sha ka 66 ron naki 25.2 over bad ym shym la don kawei ruh kaba la kamai sha ka phew ron.
Baroh hynñiew ngut ki thei kawangbol jong ka SGH ki la ïoh ban khur wicket, ka Dianchidora N Sangma (2/5) bad Rikmanchi M Sangma (2/7).
Ki thei ka SGH ki la lah ban pyndep ban beh ïa kane ka ron tang hapoh 13.5 over bad bun na ki ron ki la ïoh ban kamai lyngba ki extra. Ka Jaylynn R Marak (11 not out) bad ka Janicka R Marak (11) ki arngut kiba la ïoh ban kamai bun ron na ka bynta ka kynhun, katba ka theikawangbol jong ka NGH, ka Jessica Marak (1/14) bad ka Chigame Marak (1/18) kiba la ïoh ban pynhap wicket.
Mynta ka sngi yn sakhi ïa ka jingïalehkai kaba khadduh hapoh ka Group Stage. Ha ka Zone 1 jong ka Group A, ki thei ka East Khasi Hills CA kan aireng pyrshah ïa ka Ri-Bhoi DCA katba ha ka Zone 2, ka SGH kan sa wanphai biang ha ka jingïakhun ban ïakhun pyrshah ïa ka East Garo Hills DCA.