Yn ïaknieh namlahduh ka Christ Chruch & Umrynjah Presbyterian

Shillong, Nailur 11: Ka lympung lehkai phutbol na bynta ki skul ba la pynïaid da ka Federation of Khasi Jaintia and Garo People, Mawlai Circle kaba la tip da ka IXth Inter School Knock-Out Football Tournament 2023, ha Madan Heh Mini Stadium Mawlai Phudmuri, ka la ïoh ban pyndep ïa ka jingpynïakhun semi final, ha kaba ki ar kynhun kiba la ïoh ban rung sha ka final ki long ka Christ Chruch (Morning) bad ka Umrynjah Presbyterian.
Haba phai sha ka jingïalehkai semi final kaba nyngkong hapdeng ka Mawlai Presbyterian kaba ïakhun pyrshah Umrynjah Presbyterian, haduh kaba kut jong ka por ym shym la don ba lah ban pynïakhlad bad ïakhaid da mar 1-1.
Ka Mawlai Presbyterian ka la ïoh ban pynkhihjar nyngkong ha kane ka jingïakhun lyngba u Wilbert Kharlukhi ha ka kylla step hynrei ka Umrynjah Presbyterian ka lah ïoh ban pynïakhaid shuwa ban kut ka por na u Westarning Kurbah kaba la pynlong ïa kine ki ar kynhun ban jam sha ka tie breaker.
Ha ka jingïashut ïa ka tie breaker ka Umrynjah ka la jop da 3-2 ban ïoh rung syndon sha sha final.
Haba phai sha ka jingïakhun kaba ar, ka Christ Chruch (morning) ka la ïoh ban bteng ïa ka lynti ïaid sha ka final hadien ba ka la pynliem noh ïa ka Christ Church (day) da 2-1 kol.
Baroh ar kol na ka bynta ka Christ Chruch (Morning) ki la wan lyngba u Lurshai L Marshillong, katba na ka bynta ka Christ Chruch (Day) ka shi kol la thep da u Fredy sun.
Na ka liang jong ki nongpynïaid ki la pynbeit ban pynlong ïa ka final na ka bynta ki ar kynhun, kata ka Christ Chruch (Morning) pyrshah ïa ka Umrynjah Presbyterian ha ka 15 tarik, Nailur, 2023 kaba hap ha ka Sngi Thohdieng, ha ka por 3 baje nohphaisngi.