Shillong, Nailur 11: Ka jingïalehkai jong ka lympung SSA U-20 4th DIVISION Football League 2023 kaba la long ha madan 3rd Ground hynne ka Sngi Hat Majai, ka la kut ha kaba ki la don ar kynhun kiba la khur ïa ka namjop.
Haba phai sha ka jingïakhun kaba nyngkong kaba la sdang ha ka por 3:15 nohphaisngi, hapdeng ka Mawlynrei SC pyrshah ïa ka Madan S&CC, ka jingïalehkai ka la kut ha kaba ka Madan S&CC ka la khur ïa ka namjop da 3-1 kol.
ïa kine ki lai kol na ka bynta ka Madan S&CC ki la wan lyngba u PherManbha Lyngdoh u ba la thep haduh ar kol, ha ka minit ba 29 &52 nangta na u Arbandelness Khongsngi ha ka minit ba 57.
Ka Mawlynrei SC ka la ïoh ban pynïakhaid hashwa ban shah thep sa ar kol lyngba u Justin Marboh ha ka minit ba 35.
Haba phai pat sha ka jingïalehkai kaba bud kaba la sdang ha ka por 4:45 janmiet, ka Umrynjah SC ka la ïoh ban khur ïa ka namjop salit da 2 – 1 kol ïa ka Dilingiem YSCWA.
Ha kane ka jingïakhun, dei ka Dilingiem YSCWA kaba la ïoh ban pynkhihjar nyngkong lyngba u Rijoylang Syiemlieh ha ka minit ba 18 jong ka kylla step.
Hynrei na ka liang jong ka Umrynjah SC kam shym la kynrandien bad ïakhun tyngeh tad haduh ba u Keeperstar Lyngdoh u la ai mynsiem lyngba ka kol pynïakhaid ha ka minit ba 44.
Bad ïa ka kol pynjop la thep da u Banteilang Kharsngi- hadien ba la jam sha ka minit ba 50.
Ka jingïalehkai jong ka SSA U-20 4th DIVISION Football League 2023 mynta ka sngi, ka 13 tarik kan long kumba ju long ha madan 3rd Ground, Polo, ha ka por 3:15 nohphaisngi, ha kaba ka Mawphlang SC kan aireng pyrshah ïa ka Kharang SC, bud sa ka jingïalehkai kaba ar ha ka por 4:45 janmiet ha kaba ka Mawreng SC kan aireng pyrshah ïa ka Laitumkhrah SC.
