Jied ia ki nongmihkhmat da ka jingieid ym da ka jingtieng : Kyrmen Shylla

Kam ba ka UDP kan leh bha na rilum Jaiñtia

0

Khliehriat, K’Lyngkot 29 : U kyrtong ka UDP na Khliehriat constituency ba dei ruh u MLA ka thaiñ bad Myntri ka tnad Social Welfare ka sorkar jylla u la ong ba u kwah ban ïohi ba ki paidbah ka constituency ba kin jied ïa ki nongmihkhmat da ka jingieid bad ka jingshemphang ym da ka jingtieng.
Haba kren bad ki lad pathai khubor dang shen, u Bah Kyrmen u la ong ba ki nongthep vote ka constituency ki dei ban pyndep ïa ka hok jied nongmihkhmat da kaba jingsngew laitluid ym da ka jingtieng namar mynta ka don ka aiñ ban ïada ïa ki khnang ba kin lah ban pyndep ïa ka kamram kum ki nongshong shnong ha uno uno u kyrtong uba ki mon khlem ka jingshah pynbor.
“Ka shi vote ka jong phi ka lah ban wanrah ïa ka jingbha jong ka constituency, jong ka jylla hi baroh kawei. Hynrei lada phi pyndonkam bakla ïa ka shi vote ka lah ban wanrah ïa ka jingduh kaba shyrkhei ïa ka constituency bad ïa ka jylla baroh kawei,” u la ong.
Ha kajuh ka por u la ong ba watla u la dep ban wanrah bun ki kam pynroi kum u nongmihkhmat ha kine ki san snem na bynta ka constituency hynrei u la ong pat ba u dang sahnud ba haduh mynta kim pat ïoh ïa ka college sorkar kaba ki nong shong shnong ki angnud, ban pynbha shuh shuh ki jaka sumar bad ruh ban pyndep lut ïa ki lynti syngkien ba dang sahteng.
Haba kren pat halor ka elekshon, u la ong ba baroh ki kyrtong kiba ïakhun pyrshah ïa u kum u MLA ba mynta ki dei kiba khlaiñ satia bad kum uwei na ki kyrtong um kwah ban kheiñsting hynrei ban pynsngewthuh ïa ki paidbah khnang ba sa shisien pat un ïoh biang ïa ka jingieid bad ka jingshaniah kumba u la ïoh ha u 2018.
Kum uwei na ki nongïalam ba hakhmat jong ka UDP na rilum Jaiñtia u Bah Kyrmen u la ïathuh ruh ba ka UDP ka don ka jingkyrmen ba kan jop kham bun ngut na ka rilum Jaiñtia mynta ka kynti. “Jan baroh ki constituency ngi don ha ka jingïakhun bad ngi khmih lynti ba ngin jop kham bun mynta ka kynti,” u la bynrap shuh shuh.
Lah ban kdew hangne ba ka rilum Jaintia ka don hynñiew tylli ki constituency ha kaba ha u 2018 ka UDP bad ka NPP ki jop mar lai tylli katba kawei pat ka constituency la jop da ka Congress.

Leave A Reply

Your email address will not be published.