Halor ka kam Sohra District: Ym dei ba rai ka Forum dei ba leh hi marwei u Chairman

Shillong, Kyllalyngkot 29 : Ki dkhot jong ka Sohra District Demand Forum (SDDF) ki la pynshai ba ka jingpynmih kot khubor ba ka Forum kam hun ïa ka jingpynbna District u Myntri Rangbah ka jylla hapoh Sohra ka dei ka rai hi marwei jong u Chairman ka Forum u bah Atiar Syiemlieh bad kam dei ka rai jongka Forum.
“ Na ka liang jong kiba bun ki dkhot jongka Forum ngi pynshai ba katei ka jingai khubor u bah Atiar ka dei ka jingleh shimet jongu bad kam dei ka rai ne jingsngew jongka Forum baroh kawei” ong ka kyrwoh ba la soi da u bah L.K Kynta bad kiwei ki dkhot jongka Forum.
La ïathuh ba ha ka jingïalang kaba utei u Chairman u la hkot ha ka 20 tarik Kyllalyngkot 2023, na ka liang ki dkhot ka SDDF bun kim tip satia ba ka don kum katei ka jingïalang bad la ïakren ruh ba lada ki katto katne ngut ki dkhot ka Forum ki ïashong pyrkhat kam yn ym lah ban shim ïa kano kano ka rai lane pynmih ïa kano kano ka khubor ha kaba ïadei bad ka kam District. Hynrei une u Chairman pat u la leh marwei hi.
Kumta ki dkhot ka Forum ki kyrpad ïa ki paidbah ba kin ym sngewthuh bakla bad kin ym pdiang ïa katei ka khubor ba la pynmih da u bah Atiar Syiemlieh namar kam long kaba shisha.
Na ka liang ki dkhot ka Forum haba ïakren shuh shuh bad u nongthoh khubor ki la ong ba kum ka Forum ki pynpaw ka jingsngewnguh bad jingsngewkmen kaba khraw halor kane ka jingpynbna jongu Myntri Rangbah u Conrad K Sangma ïa kata ka District ba thymmai namar u la kular ba ka Head Quarter jongka kan long beit ha Sohra. Kumta ki kyrmen skhem ba kane ka jingkular jong u myntri rangbah ruh kan treikam hapoh une hi u snem hadien ba la kut ka election.