Kyrshan u Dr R.C Laloo bad u MDC ka NPP ïa u kyrtong ka TMC ha Jowai Constituency

Jowai, K’Lyngkot 29 : U kyrtong ka TMC na Jowai, Ma Awhai Andrew Shullai u la ïoh ïa ka jingkyrshan na u MLA barim ka constituency, Prof Roytre Christopher Laloo bad ruh na u MDC ka NPP ka Jowai North, Ma Brightstar Chyrmang, ha ka jingpynkhreh na ka bynta ka elekshon MLA kaban sa long shen ha u bnai ban wan.
Kitei ki rangbah ki la wan ruh ban donlang bad u kyrtong ha ka jingïalang sdang ïalap elekshon kaba long ha kane ka sngi Saitjaiñ ha iing sah jong u Ma Shullai kaba don ha Mission Compound ha kaba da ki spah ngut ki nongkyrshan ki la poi sha kateika jingïalang ban ïohsngew ïa ki mat treikam jong ka TMC lada ka wan ha ka bor synshar hapoh ka jylla Meghalaya ha kane ka kynti.
Nalorkine, la donlang ruh u CEM ba rim ka JHADC ma Madonbai Rymbai, MDC ba rim ma Philamon Lyngdoh, nalor kiwei de ki nongkyrshah ba hakhmat jong ka TMC nalor u MDC ka Jowai North ma Brightstar Chyrmang u ba la pynïasoh ïalade bad ka Party TMC ban ai ka jingkyrshan ba pura ïa u ma Andrew Shullai ha kane ka kynti.
Ha ka jingkren u Prof R.C. Laloo ula ong “ka kam kaba kyntang duh ka dei ka jingshakri hok ïa ki paidbah”, kumta u buh ka jingkyntu ïa u ma A.A. Shullai ba un long ka jingkyrmen na ka bynta ki khun ki kti jong ka lawei ba phyrnai.
Kum u nongmihkhmat ha kine ki 25 snem bala leit na ka Jowai Constituency ula pyrshang ban pynbha pynmiat ïa ka Jowai kum ka ïing kaba biang nadong shadong, da ka jingthmu ban aiti noh ïa ka ha uwei pat u briew u ban mih bujli ha ka jaka jong u, hynrei la poi pynban da ki briew ba nabar kiba wan shong ha ka ïing kaba ula dep shna bad kane kala pynsngewsih haduh katta ïa u ha ka snem 2018 hadien ba shah rem u ma Andrew Shullai, ong ma R.C. Laloo.
Ula ong ka jingwan jong u ha kane ka jingïalang ka long kum ka dak ban pynskhem ïa ka jingkyrshan ba pura ïa u ma Andrew Shullai. Ula kyntu ïa u ma Andrew ynda un wan ha ka bor ïaleh ban pynkhuid ïa ki ñiut kiba la pynsniew dur ïa ka sor Jowai hi baroh kawei namar kane kala pynlehraiñ ïa ka sor Jowai.
Wat ïaka Hospital MCH kaba don ha Panaliar na ka liang ka sorkar haduh mynta kam pat lah ban plie pura ïa ka. Kumjuh ruh ïa ka BEd College kala la dep tei ha Mynthong ka dang sahteng da kaba kyntu ïa u Andrew ban un pyndep ïa kine ki kam ba sahteng kiba ula pyrshang ban pyndep. Kumta u kyntu ïa paidbah ba kin thep ïa ka vote ban im ka lawei ki khun ki kti.
Na ka liang u ma A.A. Shullai ula pynsngew ïa ki mat treikam jong ka TMC hapoh ka jylla ki long ban pynkiew ïa ka ïoh ka kot, ban seng ïa ki shlem treikam lajong, ka jingtip marpoh khyndew katkum ka juk stad, ban ïarap ïa ki samla 21-40 da kaba pynmih ïa ki kam ki jam ha ryngkat ka jingïarap pisa 1000 tyngka shibnai lyngba ka Meghalaya Youth Empowerment (MYE) Scheme bad kumjuh ïa ki kynthei lyngba ka Meghalaya Financial Inclusion for Women Empowerment MFI WE) Scheme.
Ula pynsngew ba ka jingshngaiñ ha ka imlang ka sahlang lyngba ka Social Welfare yn kyntiew sha ka 12 hajar shisnem kaba kynthup lang ïa kiba thut dkhot met, ki longkmie ba khlad lok bad ki riew tymmen bad ban sdang ïa ka E-Ration Card na ka bynta baroh ki longïing hapoh ka District.
Ban pynkiew ïa ka rep ka riang, la koit ka khiah, ka pule puthi, ka umbam umdih, ka bording Electric, ki surok, ban pynneh pynsah ïa ka riti Dustur, ka put ka tem, ka kam ïalehkai Sports, ka kam jngohkai pyrthei bad ban ïada ïa ka khyndew ka shyiap.