19 ngut na rilum Khasi & Jaiñtia bad 14 na rilum Garo, kob u Bah Prestone ban jop ka NPP

Shillong, K’Lyngkot 29 : U National Vice President ka NPP, Bah Prestone Tynsong ba dei ruh u Symbud Myntri Rangbah ka jylla ha ka sngi Saitjaiñ u la ong ba katkum ka jingkheiñ ba ki ïoh lum, ka NPP kan jop kumba 19 ngut na rilum Khasi bad kumba 14ngut pat na rilum Garo.
Ïa kane u la kren ha jingïalang jong ki nongkitkam ka NPP Mawphlang kaba long ha Mawngap, ban pynkhreh na ka bynta ka elekshon MLA kaban sa long shen ha ka 27tarik u bnai ban wan.
“Na rilum Garo ym duna ïa ka 14 tylli ki seat ngin jop bad na rilum Khasi pat ym duna ïa ka 19 tylli kaba mut ngin jop ym duna ïa ka 34- 35 seat ha kane ka elekshon ban sa long shen,” u la ong da kaba kob ruh ba sa shisien pat kin shimti biang ïa ka sorkar da kaba synshar marwei khlem da khleh khaw lang shuh.
U Bah Prestone u la pynkynmaw ruh ba ha ka by-election ba dang shu lah shen ha Mawphlang, ka la don ka jingkawang ktieh kaba jur bha hapdeng jong ki, kata la ka long naduh u Bah Kennedy, Bah Samlin Malngiang bad ma u hynrei mynta pat ki la poi lang khrui ha kawei ka rynsan.
“Phi tharai yn dang rem, ngi la tikna ban jop tangba hap pynjop donburom pat baroh ar tylli kine ki constituency,” u la bynrap biang.
Ha kajuh ka por u la ong ruh ba u i sammut ban ïohi ba ki don ki party kiba kam ban jop 31 seat ha kane ka elekshon kaban wan watla ki tip ba kin shem jingeh wat ban jop tang shi seat ruh na rilum Garo.
U Bah Prestone u la kynthoh ruh ïa ka jingkam jong ka TMC ba kin pyndam noh ïa ka soskular pynbeit pud. “Kiba nud ban pyndam ïa ka, ki dei ki myndie ri,” u la ong.
Shwa kane, na ka liang u Bah Prestone u la pdiang burom ruh ïa ka kynhun jong ki nongïalam ba hakhmat jong ka UDP Mawphlang hapoh ka jingïalam jong u Bah Kospar Mawlong bad Bah Philemon Kharmyndai kiba la resaiñ noh na ka party ban treilang bad ka NPP ha kane ka elekshon ban wan. Ïa kitei ki rangbah na ka UDP la pdiang burom ha ryngkat ka jingdonlang kiwei nongïalam kynthup naduh u Bah Samlin Malngiang MLA ka Sohiong ba dang shu dep resain shen, Bah Pynïaid S Syiem MLA ka Mawryngkneng, Bah Lamphrang Blah, MDC Mawphlang, Bah Sherbor Mawlong MDC ka Sohiong bad kumjuh u Kyrtong ka NPP na Mawphlang Bah Kennedy Khyriem.
Na ka liang u Bah Kenndy da kaba pynpaw ïa ka jingkmen kaba khraw ïa ka rai jong kitei ki nongïalam ba hakhmat ka UDP ban wan pynïasoh sha ka NPP, da kaba kdew ruh ba ka Mawphlang ha ki san snem mynta ka la ïaid shadien ha ki kam pynroi.
“Kum u kyrtong ka NPP na Mawphlang nga mih ïakhun khlem ka dowry watla nga ïohi ha kotkhubor ba kiwei ki kyrtong na kiwei pat ki constituency ki kam ba ka NPP ka thong da ki klur. Ïanga ka NPP ka khlem thong bad nga ruh nga khlem pan,” u la ong.
Shuh shuh u la pynpaw ruh ïa ka jingbynñiaw halor ka jingmih ki briew kiba pynbna ba un ym ïakhun shuh ïa kane ka elekshon na ka daw ba shitom ka kurim. “Hynrei hangne don i kurim jongnga bad i shait i khlaiñ,” u la ong da kaba khot artad ïa ka khnang ba ki paidbah kin ïohi.
U Bah Kennedy u la ong ruh ba u kwah ban pynlong ïa ka Mawphlang kum ka model constituency lada ki paidbah ki ailad biang ïa u ban ïalam kum u MLA.
U MLA ka Sohiong ba dang shu dep resain shen, Bah Samlin Malngiang pat u la ïathuh ba lada ïa nujor bad ka roi ka par hapdeng ka Sohiong bad Mawphlang ha kine ki san snem ka la bun. Katkum ka jingong jong u, ka census ka kdew ba ha Sohiong constituency ki don sa tang kumba ar tylli ki shnong ba rit ki bym pat poi surok katba ha Mawphlang constituency pat ki la don palat 30 tylli ki shnong bym pat poi surok. U ong ruh ba lada kheiñ ha ka dor pisa, ka Sohiong ka la poi da ki spah klur ha kine ki san snem.
Ha kane ka sngi la ïoh ruh ïa ka jingkren na u Bah Kospar bad Bah Philemon kiba la ïathuh ba ki don bun ki daw kiba pynlong ïa ki ban mih noh na ka UDP bad kaba hakhmat eh kadei halor ka jingïaid haba ïadei bad ka jingrai ïa u kyrtong ka UDP ban ïakhun na Mawphlang.