Shillong, K’lyngkot, 29: Ki shipai BSF kiba ap pahara ha khappud ha ka sngi Saitjaiñ ki la ïoh kurup ïa ki jaiñ Saree kiba shongdor T.22 lak na khappud jong ka East Khasi Hills District ïa kiba la thmu ban khaii tuh sha ka ri Bangladesh.
Ïa ka kali kaba kit ïa kine ki jaiñ la ïoh bat da ki shipai BSF ha ka shnong Pyrdiwah. Haba ki shipai BSF ki la aidak ïa u nongñiah ban pynsangeh ïa ka kali, hynrei u nongñiah jong kane ka kali u la kynthih ïalade na ka kali ban phet krad sha khlaw bad iehnoh ïa ka kali shadien hapdeng surok.
Marmar ki shipai BSF ki la kurup noh ïa kine ki jaiñ bad aiti sha ki Pulit Custom ha Pynursla ban leh ïa kaba donkam.
Ha u snem 2022 ki shipai BSF ki la ïoh ban kurup ïa ki jaiñ kiba shongdor T.1.2 klur ïa ba la thmu ban shalan tuh sha ka ri Bangladesh.
