Ai jinghikai ka Avenues ïa ki khynnah bad ki samla ha ka Soft Skill bad Personal Development

Shillong, K’lyngkot, 29: Ha ka jingpyrshang ban ai jinghikai ïa ki khynnah kynthei bad shynrang ha ki soft skill kiba kynthup ïa ka jingshlur (Confidence), ka rukom pyrkhat shai (Clarity of Thought), ka rukom pynïadei bad kren para briew (Communication) bad ka akor burom (Human Values), ka AVENUES ka la pynlong ïa ka Annual Winter Workshop naduh ka 6 tarik haduh 27 tarik Kyllalyngkot 2023. Haduh 36 ngut ki heprit bad khynnah samla hapdeng 6 snem bad 15 snem ka rta ki la ïashim bynta ha kane ka jingai jinghikai bad ki la ïoh pdiang ruh ïa ki syrnot ha ka jingdon ryngkat ki kmie ki kpa.
Ka Meaidaibahun Majaw, kaba la 12 snem ka rta, ka la ong, “ha ka por ba dang sdang kane ka prokram, ngam sngewtynnad ban ïadei bad ban ïajan bad kiwei ki khynnah. Hynrei kat dang ïaid ki sngi bad kat dang shong ha ki klas, nga sdang ban sngewthuh ba ka jingïasngewthuh jingmut bad jingïatrei lang ka long kaba donkam ba ngin jop ïa ki thong jong ngi.”
Ka Jasmine Laitflang, kaba long Academics Head jong ka AVENUES, ka la ong, “Ngi ngeit ba ki khynnah ki don la ka jong ka jingsngewtynnad bad ki shim la ka jong ka por bad rukom ban ïoh diang ïa ka jingnang jingstad. Kumta ïa ka rukom hikai jong ngi ruh la pynwandur ha kata ka rukom ba iwei pa iwei i khynnah in ïoh jingmyntoi bad yn nym don ba shah sah dien.” Ka ïai bteng ruh da kaba ong ba ki ïai pynthymmai ïa ka rukom hikai da kaba bud dien ïa ki jingpyrshang kiba seisoh bad kiba ïarap ïa ki khynnah ban sngewthuh shai bad kynmaw kham bha ïa ki jinghikai. “Ha ki klas jong ngi ha AVENUES, phin ïohsngew ïa ki jingtem jingput, phin ïohi ïa ki jingïalehkai bad phin lap ïa ki jingïaphylliew jingmut para khynnah. Kane ka ïarap ban ai kata ka rynsan ha kaba ki khynnah ki sngew laitluid bad shlur ban pynsngew ïa la ki jong ki jingmut, bad pynpaw ïa la ki jong ki jingtieng jingsyier bad ban ïathuh lem ïa ki jingthmu jong ki,” ka la ong.
Kawei na ki bynta kiba kongsan jong kane ka workshop ka dei ka jingpynrung ïa ka Science, Technology, Engineering and Mathematics (STEM) ha ka Curriculum jong ka. Ïa kine ki sien ai jinghikai la pynlong ryngkat ka jingïatrei lang ka AVENUES bad ka Curiosity Gym na Mumbai.
U Girish Nair, uba long u Founder-CEO jong ka Curiosity Gym, u la pynïaid ïa kine ki seshon bad u la ïakynduh ruh ïa ki kmie ki kpa ban pynsngewthuh ïa ki ïa ka jingdonkam bad jingmyntoi jong ka STEM ïa ki khun jong ki ha ki por kiba mynta. “Ki sobjek Saïan bad Jingkhein ki long kiba donkam katta katta eh hynrei bun na ngi ngi sheptieng ïa ki namar ngi pyrkhat ba ki long kiba eh. Ka jingthmu jong kine ki seshon ka long ban hikai ïa kine ki sobjek ha ka rukom ba ki heprit ruh kin sngewthuh bad sngewtynnad ban shah hikai.” U la ong shuh shuh ba u lap ba ki khynnah ha kane ka workshop ki long kiba thrang shisha ban nang ban stad ha kine ki sobjek bad kane ka jingthrang jong ki kan dang kiew lada ki ïoh lad ban ïakynduh bad ïaphylliew jingmut lem bad kiwei ki khynnah na kylleng ka ri.
U Ben-Hanan Oshea Kharmawphlang, uba la 11 snem ka rta, u la pynpaw ba ha kaba nyngkong u don ka jinglehrain bad jingtieng ban ïakren bad kiwei ki khynnah bad ban shim bynta ha klas. “Kane ka workshop ka la ïarap ïanga ban don kata ka jingshlur ban kren la ka dei ha jrong stage lane ban kren para khynnah,” u la ong.
U heprit Meshanbor Thangkhiew, 7 snem ka rta, u la ong, “Nga la sngewthuh kumno ban long u khynnah uba shlur, ban pynduh ki jingmlien kiba sniew bad ruh ban pyni ka akor burom hangno hangno ba nga don. Nga la nang ruh ban spel ïa ka kyrteng jong nga da kaba pyndonkam ïa ka sign language.”
Ha ka ‘Open Day’ ki khynnah nongïashim bynta ki la pyni ïa la ki jong ki sap kiba kynthup ïa ka rwai ka shad, ka tem ka put, beatboxing, poitri bad ïathuhkhana, speed cubing, martial arts bad art & craft.
U Bah Davis Lyngdoh, u kpa jong iwei na ki nongïashim bynta, u la ong, “Ka por ba u khun jong nga u la pynlut ha kine ki seshon ha AVENUES ka la long laba myntoi shibun. Nga ïohi da lade kumno ki pynïaid ïa ki klas bad u khun jong nga u la kham shlur bad ka rukom pyrkhat jong u ruh ka la kham pher bad kham long rangbah.”
Kum shibynta jong ka jingrakhe ïa ka lyngkhuh snem kaba 51 jong ka jylla, ki nongïashim bynta jong kane ka workshop ki la leit jngoh ïa ka Sohrarim Nook ban rakhe ïa ka Meghalaya Day ha ka 21 tarik Kyllalyngkot bad ki khynnah pule na katei ka jaka.
Ka AVENUES ka ju ai ïa kum kine ki jinghikai ha ka Soft Skill bad Personal Development ïa ki heprit bad khynnah samla kylleng satlak ka jylla Meghalaya bad shatei lammihngi jong ka Ri India mynta la jan 20 snem, ha kaba palat 100,000 ngut ki samla kynthei bad shynrang ki la lah ïoh jingmyntoi.