Lada u Bah Olan Suiñ un jop, kam dei da ka bor pisa hynrei da ka jingtrei shitom ki paidbah: Renikton
Mawsynram, K’lyngkot, 29: Ka United Democratic Party (UDP) jong ka Mawsynram Constituency ha ka sngi saitjaiñ jong ka taïew ka la ïoh ban plie paidbah ïa ka ophis treikam ba pura jong ka party ha Mawsynram ha kaba u bah Renikton Lyngdoh Tongkhar u kyrtong ka UDP na ka Mawkyrwat Constituency uba la shim ïa ka bynta ban plie ïa ka ophis ha ryngkat ka jingïadonlang u bah Ollan Sing Suiñ u kyrtong ka UDP na ka Mawsynram Constituency ryngkat ka jingïadonlang ki riew rangbah, ki longkmie bad ki samla shynrang bad kynthei kiba long ki nongkitkam na ki Unit bapher bapher.
Hadien ka jingplie ïa ka ophis treikam, la ïoh ruh ban pynlong ka jingïalang ban pdiang burom ïa ki nongkyrshan ba thymmai kiba la wan pynïasoh sha ka UDP Mawsynram Circle kata kiba dei na ka NPP, INC, bad na ka BJP ryngkat ki nongbud ha kaba u bah Ollan Sing Suiñ ula shim ïa ka bynta ban pdiang burom ïa ki ryngkat ka jingpyndeng ïa ka mawphlor kaba don ïa ka shap jong ka UDP.
U bah Renikton Lyngdoh Tongkhar haba kren ha ka jingïalang u la pynpaw ka jingaikhublei ïa ka UDP Mawsynram Circle kaba la pynurlong ïa kane ka bynta ban plie ïa ka ophis treikam bad kaba long ruh ka sngi jong ka jingsah jingkynmaw ïa ka party UDP. Kumta da ka jingïoh ban plie kan pynsuk ruh ha kiba bun ki kam ba pynïaid shaphrang namar lada ka jingtreikam ka long tang u bah Ollan marwei ka nym poi shano shano hynrei kane ka sngi ka pynpaw ruh ba ki paidbah ki don lang ïa kata ka jingïatreilang ha ki bynta baroh.
Ha kaba ïadei bad kane ka sngi, u bah Renikton Lyngdoh Tongkhar u la pynpaw ruh la jingaikhublei ïa ki paidbah nongkyrshan kiba wan mynta ka sngi ha kane ka jingïalang namar ki la wan da ka mon sngewbha la jong ban long ki nongkyrshan ba pura jong ka UDP ha Mawsynram Constituency bad lyngba kane ka pashad ruh ïa ki jingmut ba kum ki paidbah kim dei than ban ap ïa kiei kiei ne thut shen ha ki por elekshon lada ym ïoh ei ei hynrei ki dei ruh ban pyrkhat kumno ban ïaid shakhmat da lade ruh ban pyntyllun ïa ki kam kiba bun.
“Ngin lah ban jop ïa kane ka elekshon ym da ka jingbit jingbiang jong u kyrtong marwei hynrei ka jingbit jingbiang lyngba ka jingtreishitom jong ki paidbah”, ong u bah Renikton Lyngdoh Tongkhar bad ong ruh ba kumba la ju tip ba ka Mawsynram Constituency kan dei kawei na ki konstitwensi kaba ju lut phut ha ki por elekshon hynrei ha kane ka kynti ba mynta ai ba ki paidbah kin pynkylla noh bad hikai ruh ïa ki paidbah jong ka Meghalaya ba kin wanrah biang ïa ka burom kaba la jah noh hapoh kane ka konstitwensi bad kin pyntip ruh ba ka Mawsynram kam dei shuh kaba kumta ka jingshah kynthoh hynrei ka dei kaba jied ïa ka jingshisha, ban sei ïa ki nongïalam ba shisha, ki nongïalam kiba ieit ïa ka jaidbynriew bad ki nongïalam kiba don ïa ka nongrim kaba skhem.
U la bynrap shuh shuh ba lada u bah Ollan Sing Suiñ un jop ha kane ka elekshon 2023, ka Mawsynram Constituency kan sa long kawei na ki nuksa ba ka jingjop jong u kam dei da ka bor jong ka pisa hynrei ka dei lyngba ka jingtreishitom bad jingai ka kti ka mon ka kti ka diang jong ki paidbah na kylleng ki jaka.
Ha kane ka sngi la ïoh ruh ka jingkren na ki riew rangbah kiba kynthup naduh u kyrtong jong ka UDP Mawsynram Consti-tuency, u bah Ollan Sing Suiñ bad kumjuh ruh na kiba la wan ban pynïasoh sha ka UDP Mawsynram Circle kata u bah Daniel Wahlang na ka BJP, u bah Sol Sangma na ka NPP bad u bah Neral na ka INC.