Shillong, Iaiong 24 : Wat la ka Harijan Panchayat Committe (HPC) ka la pynpaw ba kim treh ban mih na them ïew Mawlong ha ka shithi ba ki la jubab sha ka sorkar hynrei mynta ka sngi u Symbud Myntri Rangbah ka Jylla u Bah Prestone Tynsong u la kren shai kdar ba jia katba jia ne long katba long yn pynkynriah beit ïa ki Kharmetor na Them ïew Mawlong kumba la dep rai da ka HPC bad mynjur ruh da ka Kynhun Myntri naduh mynshwa.
“Lada phi kylli ïa nga la ka Sorkar kan ïaid shakhmat ïa ka jingtyrwa, ka jingtyrwa ka long kaba shai kdar namar kumba nga ong naduh ka sngi ba nyngkong, ka jingpynkynriah kan hap ban jia beit la ka long kumno kumno ruh” ong u Bah Prestone haba ïakren bad ki nongthoh khubor.
Kane ka jingkynthoh jong u ka la mih hadien ba ka Harijan Panchayat Committee (HPC) ka la kyntait ïa ka jingtyrwa jong ka Sorkar ban pynkynriah ïa ki 342 tylli ki Longïing na Them Metor sha ka jaka jong ka Shillong Municipal Board (SMB).
U Bah Prestone ula ong ba ka High Power Committee (HPC) ka la dep kren shai ha ka jubab ba la ai ha ka 20 tarik Iaiong ba “Kim shym la pdiang ïa ka blueprint ba la ai da ka Sorkar sha ki. Kane ka dei ka kam kaba jia mynta”.
Haba kylli, u Symbud Myntri Rangbah ula pyntip ba u Advocate General lem bad kiwei ki riewstad aiñ ka Jylla ki dang pule bniah ïa baroh ki kot ki sla bad shithi jongka HPC bad shen ka Sorkar kan sa shong ban ïakren ïa kane ka kam.
Ha ka Lah Sngi U Blei, ka ïing Bishar High Court jongka jylla ka la pynkynriah ïa ka jingshong bishar ïa ka mukotduma halor kane ka kam sha ka 7 tarik u Jylliew.
Ka ïing Bishar ka la pynmih ïa kane ka hukum halor ka jingkyrpad jong ka Sorkar Jylla bad ka Harijan Panchayat Committee (HPC) ha ka jingshong bishar ha ka Lah Sngi U Blei.
