Jam ka Mawlai bad ka Ladthadlaboh sha ka semi final ha ka MSL 2024

0

Shillong, Kyllalyngkot 11: Ka Mawlai khlem jingbakla ka la pynjemkhnap ïa ka Khliehmawlieh ban jop haduh 8-0 ha ka jingïakhun Quater final jong ka Meghalaya State League 2024 ha madan First Ground – SSA Stadium, Polo ha ka sngi Saitjaiñ ban buh jaka ïalade ha ka semi final jong kane ka lympung ïalehkai phutbol kaba heh tam jong ka jylla.
Ka Khliehmawlieh, ka kynhun ba wan kyrdan ba ar (runners-up) ha MSL u snem 2023, kaba la pawnam da kaba pynliem ïa ka Mawlai ha ka semifinal ha ka sien pynlong ba khatduh ïa kane ka lympung, ba la pynlong da ka Meghalaya Football Association ryngkat ka jingkyrshan na ka Sorkar Jylla Meghalaya. Hynrei, ban pynurlong biang ïa katei ka jingjop kam shym la long kam mynta ka kynti, ha kaba ka Mawlai khlem jingbakla ka la tehlakam ban synshar ïa ka jingïalehkai ha baroh ki 90 minit.
Ka Mawlai ka la ïoh ban lamkhmat 2-0 kol ha ka kylla step, da ka kol ba la kum thep hi u player ka liang pyrshah ha ka 26 minit bud sa na u Khrawkupar Jana u ba la thep ha ka minit ba 35. U Robert Khongriah (53′, 55′) u la thep ïa ar tylli ki kol marïabud kawei hadien kawei, bud sa ar tylli ki kol jong u Romarius Laban (64′, 83′), u Khrawkupar (87′) bad sa shi sien na u Kevin Rymbai (90’+1) ha kaba ka Mawlai kam shym la pynjaijai ban ñion wat tang shi khyllipmat ruh.
U Robertson u ba la thep ar tylli ki kol bad kawei ka assist u la ïoh ban khur ïa ka nam ‘Player of the Match’ na ka bynta ka jingtrei shitom jong u, bad u la ïohpdiang ïa ka khusnam na u Bah Hamletson Dohling – President jong ka Meghalaya Football Association.
Ha kawei pat ka jingïalehkai ha katei ka sngi la sakhi ïa ka Ladthadlaboh kaba la wanphai hadien ba shah lamkhmat shuwa shi kol ban pynliem ïa ka Sutnga da 5-2 kol ha ka jingïalehkai ‘Jaiñtia Hills Derby’ ha Diengshynrum, Khliehriat.
Shuwa kane ka jingïalehkai, ka Sutnga bad ka Ladthadlaboh kim pat ju ïakynduh mynno mynno ruh ha kane ka lympung, bad ka Sutnga – kaba na East Jaiñtia Hills ka la ïoh ban lamkhmat ïa ka jingïakhun ha ka minit ba 13 lyngba u Raplangki Lyngdoh. Hynrei tang shi phew minit shuwa ban kut ka kylla step ka Ladthadlaboh – na West Jaiñtia Hills, ka la pynïakhaid lyngba u Rangdajied Sayoo (36’min).
Hynrei ha ka kylla miet ka jingïalehkai la sdang ban synshar tang da kawei ka liang, ha kaba ka Ladthadlaboh ka la seisoh bha ban tehlakam ïa ka bol bad pynkhih ruh ïa saw tylli ki kol lyngba u Dangaitlang Mulieh (51′), nangta sa shi sien na u Rangdajied (68′), Banteilang Shylla (70′) bad u Dowell John Shylla (89′).
Wat hapdeng kane, u Solmon Sympli (77′) u la ïoh ban thep ïa ka kol kaba ar na bynta ka Sutnga hynrei ka por ka la dier palat ïa ka kynhun ban pyrshang wanphai.
Lah ban kdew ba ka Shillong Lajong ka la long ka kynhun kaba nyngkong eh ban rung sha ka semi final da kaba pynkhyllem noh ïa ka lahduh ba ïada burom – ka Rangdajied United da 3-1 kol ha ka jingïakhun quarterfinal ba nyngkong ha ka taïew ba la dep.
Ka jingïakhun jong ka Quarter final kaba saw bad kaba khadduh kan long hapdeng ka Chipakkore bad ka Rymbai Shkenshynriah ka ban pynlong ha PA Sangma Stadium ha Tura ha ka 14 tarik Kyllalyngkot ha ka por 1 baje mynsngi.

Leave A Reply

Your email address will not be published.