Lah ban ïoh pynlong ka JN Stadium ïa ar tylli ki jingïalehkai phutbol bar ri ha u Lber

0

Shillong, Kyllalyngkot 12: Ka long ka khubor kaba sngewtynnad bad kaban pynkmen ïa u paidbah ba ieit ïa ka phutbol ha kaba na ka liang jong ka All India Football Federation (AIFF) ka la tyrwa sha ka Meghalaya Football Association (MFA), na bynta ba kan pynlong ïa ar tylli ki jingïalehkai ri hangne ha nongbah Shillong, katta ha madan Jawaharlal Nehru Sports Complex, Polo.
Katkum ki khubor ba la ïohlum, la ïoh jingtip ba kine ki artylli ki jingïalehkai kiba ka AIFF ka la tyrwa sha ka MFA ka long ha ka 19 ne ka 20 tarik u Lber mynta u snem, ha kaba la thmu ban pynlong ïa ka jingïalehkai paralok lane ka International Friendly hapdeng ka India pyrshah ïa ka Maldives.
Hadien kane, yn bynrap pat da ka jingïalehkai kaba dei jong ka lympung AFC Asian Qualifying Round, ha kaba ka India kan pynkhreh ban aireng pyrshah ïa ka Bangladesh, ka ri kaba marjan bad ka jylla Meghalaya, bad kane ka jingïakhun la buh ba kan long ha ka 25 tarik u Lber mynta u snem.
Haba ïadei bad kane, ha ka sngi Saitjaiñ, ka la don ka jingwan jurip da u Akshay Rohatogi uba dei u Head of Competition ryngkat bad u Abhishek Yadav u ba dei u Deputy General Secretary ka AIFF, ïa baroh ki bynta jong ka JN Stadium, Polo.
Haba ïakren bad u President ka MFA – Bah Hamletson Dohling, u ïathuh ba ïa kane ka jingtyrwa ka AIFF ka la wan lyngba na u President ka AIFF – u Kalyan Chaubey, haba u bah Hamletson u la pynpaw ba na ka liang jong u ula jubab ba mar mar yn nym lah ban ong hooid ne em, hynrei u la pynpaw ha u Chaubey, ba un rah ïa kane ka khubor ban pynsngew shwa sha ka sorkar jylla.
Hadien kane u bah Hamletson u la pynpaw pat ïa ka jingsngew kmen ba ynda haba u la ïoh ban pynsngew ïa kane ka khubor, ka sorkar ka la mynjur ba kan ïadon bynta lang bad ka MFA lem bad ka AIFF ha kaban pynlong ïa kine ki artylli ki jingïakhun.
Hadien kane ka jingwan kine ki dkhot ka AIFF, ha ka 20 tarik mynta u bnai, kan don sa ka jingwan jurip jong ki briew kiba dei napoh ka Asian Football Confederation ne ka AFC, ha kaba ka rai ban pynthikna ba ka nongbah Shillong kan ïoh ne em ban pynlong ïa kine ki lympung kan dei lyngba kane ka jingwan jurip.
Kum u nongïalam ka MFA, bah Hamletson u kyrmen ba kiei kiei baroh kin ïaid beit kumba la thmu, katno tam lei lei ba ka jylla ha ka sien kaba nyngkong kan ïoh ïa kat kane ka nam bad ka burom ban pynlong ïa kine ki artylli ki jingïakhun hangne hapoh ka nongbah.

Leave A Reply

Your email address will not be published.