Iphuh iphieng ka jingrakhe ïa ka lyngkhuh jingdap 75 snem ka jingïoh laitluid ka Ri India ha South West Khasi Hills

Mawkyrwat, ‘Nailar, 16: Ryngkat ka jingïasohktilang bad ka Ri India baroh kawei, ka South West Khasi Hills District ha ka sngi nyngkong jong ka taïew ka la rakhe ïa ka jingdap 75 snem jong ka jingïohlaitluid ka Ri India, ka jingdap 50 snem jong ka jingïoh ïa ka jylla ba pura bad kumjuh ruh ïa ka jingdap 10 snem jong ka South West Khasi Hills District ha kaba ïa ka jingïalang la pynlong ha madan jong ka Nativity Higher Secondary School, Mawkyrwat ha ryngkat kaba i-phuh i-phieng bad i-shongshit bad i-shongkun.
Ha kane ka jingrakhe u bah Renikton Lyngdoh Tongkhar, Nongmihkhmat jong ka Mawkyrwat Constituency bad kum u Myntri ka tnad umbam umdih jong ka Jylla Meghalaya u la kyntiew ïa ia ka Lama ka Ri bad shim ïa ka salute jong ka Parade kaba la ïa shimbynta da ki khynnah jong ki 5 tylli ki skul kynthup ïa ki National Cadet Corps (NCC) jong ka Sngap Syiem College, Mawkyrwat bad ki Pulit.
La nang pynbyrngia bad pynshongshit shuh shuh ïa ki paidbah nongpeitkai da ki Cultural Items. Ha kajuh ka por la sam ruh ïa ki jingbam sha ki nongpang jong ka CHC bad PHC bad kumjuh ruh ïa ki khunswet jong ka Hope Orphanage, Mawlangwir (Mawkyrwat) bad ba la pynbud janmiet da ka jingïalehkai kynjatbol hapdeng ki ophisar jong ka South West Khasi Hills District pyrshah ïa ki ophisar jong ka West Khasi Hills District ha kaba ka South West Khasi Hills District ka la jop da 3 – 1 kol.
Nangta, la sam ruh ïa ki khusnam sha ki nongjop ha ka jingïalehkai marathon kaba la long ha ka 13 tarik u ‘Nailar, 2022 bad ïa ki nongïashimbynta ha ka Cultural Items.
Haba phai ha ka March Past, ka Jawahar Navodaya Vidyalaya, Mawkyrwat ka la ïoh ïa ka namlah suh bad bud da ka Mawranglang Presbyterian Secondary School ha ka kyrdan kaba ar bad ka Maharam Government Higher Secondary School, Mawkyrwat ha ka kyrdan kaba lai.
RANIKOR: Ïa kane ka sngi ba kyrpang la rakhe ruh hapoh Ranikor Civil Sub- Division ha kaba u bah Pius Marweiñ, u Nongmihkhmat jong ka Ranikor Constituency u la pynher ïa ka Lama ka Ri bad shim ïa ka salute jong ka Parade Contingent kaba la long ha madan jong ka Nolikata, Ranikor C&RD Block.
La pynshongshit ïa kane ka sngi da ki cultural items, ka jingsam khusnam, ka jingpynïalehkai ïa ki khynnah bad ka jingïalehkai kynjatbol hapdeng ka Officer’s Club, Ranikor pyrshah ïa ka Mulor ba ïa khleh lang bad ki Rangbah Shnong ka thaiñ Ranikor ha kaba ki la pynrem ïa ka Officer’s Club bad khur ïa ka pisa kaba T. 10/- hajar tyngka bad T. 5/- hajar tyngka ïa ka officer’s Club ba la ai sngewbha da u Nongmihkhmat jong ka Ranikor Constituency.
Ha ka March Past, ka Nolikata Higher Secondary School ka la rah ïa ka nam lahduh ba la pynbud da ka Nolikata Upper Primary School ha ka kyrdan kaba ar bad da ka St. Thomas RCUP bad Nibon L.P School ha ka kyrdan kaba lai.
Ka Shakti V.O. Karaigora ka la ïoh ïa ka kyrdan kaba nyngkong katba ka Mawpyllun V.O. Akawe ka la ïoh ïa ka kyrdan kaba ar ha ka cultural programme bad bud sa ka jingsam ruh ïa ki jingbam sha ki khynnah.
Kum ka dak jong ka burom, ka jingieid bad jingsngewsarong ïa la ka Ri hapoh ka ‘Har Ghar Tiranga campaign Flags’, la sieh ïa ki Lama ka Ri ha ki ïing skul, ki ophis treikam, ki hospital, ha ïew, ha ki ïing briew bad ha kiwei kiwei ki jaka khnang ban pynkhie bad pynkhie im ïa ka jingieid Ri hapdeng ki paid nongshong shnong kaba la sdang naduh ka 13 tarik bad ka ban kut noh ha ka 15 tarik u ‘Nailar noh phaisngi.