Shillong, Nailar 16 : Ka jingrakhe ïa ka jingdap 75 snem ka Ri India ha ka 15tarik mynta u bnai ba la pynlong da ka Seng Congress ha Meghalaya, ka la long kaba shongshit bha namar la wan ban shmti da ki spah tylli ki kali arshaka.
Ïa kane ka jingrakhe la pynïaid da u Bah P. N. Syiem, Working President MPCC ryngkat ka jingdonlang u MP ka Shillong ba dei ruh u President ka MPCC, Bah Vincent H Pala kum u Kongsan.
Ha kane ka jingïalang la ïa don ryngkat ruh ki nongïalam shnong ka shnong Mawpat kiba kynthup ïa u Bah Banshan Myrchiang, Assistant Secretary ka Dorbar Shnong Mawpat, Bah Firstborn Marbaniang, Rangbah Dong ka Circle I, Bah Forward Sarti, Rangbah Dong ka Circle III bad kiwei de ki rangbah.
Nalor kine la don lang ruh ki nongïalam ka MPCC kiba kynthup ïa I Kong Wansuk Syiem, General Secretary MPCC, Kong Deborah Marak, Working President MPCC, bad kiwei de ki nongïalam jong ka party, la ïa don ryngkat ruh u Bah Adrian C. Mylliem, President Meghalaya Youth Congress Committee bad ki hajar ngut ki samla kynthei bad shynrang kiba ïa shim bynta ha ka bike rally.
Ha kane ka jingrakhe la ïoh ïa ka jingkren na i Bah Adrian C. Mylliem, Bah Banshan Myrchiang bad Bah Vincent H. Pala kum u kongsan. Ki nongkren ha ka jingkren jong ki, ki la pynpaw ka jingsngewkmen shikatdei eh ba ki la ïoh ban rakhe ïa ka jingdap 75 snem jong ka Ri India bad ki la kyntu ruh ïa ki samla ban ñiah ïa ki bike jong ki da kaba husiar bha ban lait na kino kino ki jingjia.
Ka jingïaid rally ki bike ka la sdang na Mawpat da ka jingkaweh lama u kongsan Bah Vincent H. Pala bad bteng ter ter sha Lankyrding Mihngi, Lumshyiap, Golflink, Pynthorbah, Nongmensong, Nongthymmai, Laitumkhrah, Upper Shillong bad pynkut ha Police Bazaar ha office jong ka Congress Party.
