ïoh kurup ki pulit ïa ka Register ba thoh ïa ki kyrteng ki 100 ngut ki dkhot ka NLCN

Shillong, Nailar 21 : Ki pulit ka jylla ki la ïoh ban kurup ïa ka Register kaba la thoh ïa ki kyrteng jong ki 100 ngut ki dkhot jongka seng kieng atiar kaba thymmai ka National Liberation Council of Nonkyndong (NLCN).
Ka tyllong khubor ka ïathuh ba ïa kane ka Register bad kiwei kiwei ki kot ki sla ba donkam la ïoh ban kurup na ka jaka ba la buhrieh da uwei u dkhot ka seng uba la shah kem ha kine ki khyndiat sngi. Hadien ka jingshah kem ki 11 ngut ki dkhot ka seng NLCN ki pulit ki dang pynlong mynta ka jingkhynra kaba jur ha Khasi bad Jaintia Hills ban ïoh kem ïa kiwei ki dkhot khamtam kitei kiba la paw kyrteng ha katei ka register ba la ïoh ban kurup da ki pulit.
Kat haduh mynta ki pulit ki la kem ïa ki 11 ngut ki dkhot kiba kynthup ïa ki saw ngut ki nongïalam ba hakhmat eh jongkane ka seng. Baroh kine kiba la shah kem ki la don sha Shillong bad la dep tian bishar ïa ki hakhmat ka ïing bishar ha kaba ka ïing bishar ka la ailad ïa ki pulit ban tohkit ïa ki 8 haduh 10 sngi bad set ïa ki ha byndi ki pulit.
Ar ngut na ki dkhot kynthup ïa kawei ka kynthei mynta ki dang don hapoh hospital. Ha ka taiew ba la dep hadien ba ki pulit ki la lap ksai ïa ka jingthaw ïa kane ka seng ba thymmai ki la thwet jur bad ïoh kem shwa 7 ngut ki dkhot kynthup ïa uwei uba dang khynnah ka rta nangne na Khasi Hills. Kine kiba la shah kem ki kynthup ïa u Chairman, Commander-in-Chief, General Secretary, Area Commander ka West Khasi Hills, Area Commander Jaintia Hills, u nongpynrung dkhot bad u nongkyntiew kyrteng ha ka register lem bad 3 ngut kiwei pat.
Ki pulit ki la lap ksai ba kane ka seng NLCN ka la ïapynbeit bad kawei ka seng kieng atiar na Nagaland ba kan phah leit pyntbit ïa ki dkhot ba nyngkong eh jongka bad kane ka kynhun ka la dei ban mih ha ka 17 tarik mynta u bnai. ïa kane ka seng la thaw hangne ha Eastern Range ( Khasi bad Jaintia Hills) da kine ki samla ba la shah kem ban ïaleh pyrshah ïa ka sorkar da ki tiar siat (suloi) ban dawa pisa ban thied tiar ïaleh bad leh ïa ki kam beaiñ.
ïa kine kiba shah kem la pynngat ha ki kyndon aiñ IPC bad Unlawful Activities ( Prevention) Act (UAPA). Ki pulit ki la ïoh ruh ban kurup ïa ki mobile phone na kine ki dkhot ba la shah kem. Ka jingthmu ka NLCN ka long ban pynrung dkhot haduh 1500 ngut bad mynta ki la dep pynrung kumba 100 ngut ki dkhot. ïa kane ka seng la thaw naduh u snem ba la dep hynrei ki dang sdang ban pynrung dkhot mynta dang ar bnai ei ei.