Shillong, Nailar 21 : Ka Meghalaya High Court ha ka sngi Nyngkong ka la ong ba ym lah satia ban pdiang ban ai daw ba dei u slap halor ka jingjot rathai ki surok.
Haba bishar halor ka PIL, ka Division Bench ba kynthup ïa u Chief Justice Sanjib Banerjee bad Justice B Bhattacharjee, la ong ba ka jinglong jingman ki surok ha ka jylla kim dei satia kiba da ihun bad ka jingaidaw ba dei na ka daw ka jing jur u slap, ka jingrem ka bai maramot bad dei na kata ka daw ka jingmaramot ka shimpor bad sangeh ha ka por ba jur u slap.
“La mih kajuh shi kajuh ha kiba bun ki order bad namar ba kane kadei kawei na ki jaka ba jur slap tam ha ka pyrthei, kumta hap ban shimkhia bha haba shna surok bad ka jingkhleh ïa ki rukom siang ruh dei ban da leh bha da kaba buh hakhmat ïa ka jingjur u slap khnang ba ki surok kin neh. Ym lah ruh ban pdiang ban shu ai daw ïa u slap ban pynshisha halor ka jingsniew ki surok,” ka la ong ka Division Bench.
Ha kajuh ka por ka Bench ka la bthah ruh ïa ka tnad PWD (Roads) ban peit ba baroh ki surok dei ban maramot bad ong, “Kyrmen ba ka PWD (Roads) kan shong bad peit ia baroh ki surok ban maramot bha khnang ban pyntikna ba ka jingïaid ki kali kan ym thut ha ka por slap.
Ha katei ka jingbishar, la ai ruh ïa ka kaiphod da u Executive Engineer PWD (Roads), Tura da kaba kdew halor ka jinglong jingman jong ka surok AMPT.
Ka order ka ong ruh ba ha ka paragraph ba khyndai jong ka kaiphod, u EE u la kdew ïa ki lai ngut ki kontraktor kiba la don bynta halor katei ka surok na 33rd haduh 41st KM jong ka AMPT Road bad ban pynbha ïa ka. Hynrei u nongujor uba la shah ktah ha ka jingsniew palat ka surok, la kdew ba ka jingmaramot kam dei ha ka por kaba biang lane kam tikna.
Kumta na bynta katei ka mat kaba ïadei bad ka surok AMPT yn sa tian bishar biang hadien 6taiew.
