Mawkyrwat, Ïaïong 23: Ki samla pule na ka Union Christian College (UCC), Ri Bhoi District, ha ka jingïalam jong ka kong L.T. Phida Kharsyntiew, kumjuh ruh ki National Cadet Corps (NCC) jong ka Sngap Syiem College, Mawkyrwat, ki la ïoh shibun ki jingmyntoi ha ka jingïashimbynta jong ki ha ka prokram ai jinghikai kaba ïadei bad ka jingïalehkai mountaineering bad rock climbing kaba la pynlong ha Kynrewmyllah Adventure Training Centre and Eco-Tourism ha Mawranglang, South West Khasi Hills District.
Ha kane ka prokram, ki samla pule ki la ïoh jingtip shaphang ka rukom kiew lum bad ka jingïalehkai kum ka zip lining ha kaba ïa kine ki jinghikai la ai bad pynlong da u bah Pilastar Nongsiej, uba la paw ha ka ri India kum uwei na ki nongkiew lum ba kynsai, da kaba ïoh ïa ka kyrdan ba 35 ha ka National Climbers.
Ym tang kata une u rangbah u dei ruh u Chief Belayer ha ka Enter Command jong ka jingïalehkai Sport Climbing jong ka ri India bad u nongseng ïa ka Kynrewmyllah Adventure Training Centre and Eco-Tourism ha Mawranglang, South West Khasi Hills District ba la plie paidbah ha ka 12 tarik u Nohprah jong u snem 2021.
Ha kane ka sngi, ki samla pule jong ki ar tylli ki kolej ki la pynpaw ka jingkmen kaba khraw namar ka dei ka sien kaba nyngkong ba ki ïohlad ban shah hikai ha kine ki jait jingïalehkai. Ki la ong ba kane ka jingïoh jinghikai ka long ka jingïarap kaba khraw ban kyntiew ïa ka mynsiem jingïakhun bad ka jingshlur, bad kum ka nuksa ban bud ïa ka thong jong ka jingjop ha ka jingim.
U bah Pilastar Nongsiej, kum u nongseng ïa ka Kynrewmyllah Adventure Training Centre and Eco-Tourism, ula pynpaw ba ha ki snem ba la leit, ula ïakynduh shibun ki jingeh bad ki jingduna ha ka rukom pynïaid ïa kane ka kam. Ym tangkata, ula ong ruh ba kum ka jaka ai jinghikai ka donkam shibun ki lad jingïarap na ka sorkar, khamtam ban tei ïa ka Climbing Wall, namar ha jylla Meghalaya ym pat don kum kane ka jingïalehkai hynrei wat hapdeng kine ki jingduna, ki samla ki dang lah ban wanrah ïa ka nam bad ka burom sha ka jylla haduh ka kyrdan National ha ka jingïakop kiew lum bad ki jingïalehkai ba ïadei bad ka adventure.
