Shillong, ïaïong 23: Ka Shillong Lajong FC kan sdang ïa ka jingïalehkai ba nyngkong ha ka wat ïakhun Championship Round jong ka lympung Indian Football League 2025-26 pyrshah ïa ka Dempo Sports Club. Kane ka jingïalehkai kan long hala ïing ha madan First Ground-SSA Stadium, Polo ha kane ka sngi U Blei (26 tarik ïaïong), bad kan sdang ha ka por 6:30 baje janmiet.
Ka Lajong ka la pyndep ïa ka Stage 1 ha ka kyrdan kaba ar ha ka miej da kaba kamai 17 point, bad baroh hynriew tylli ki kynhun kiba ha khmat eh ha ka miej ki la ïohrung sha ka Stage 2 na ka bynta ka Championship Round, katba ki saw kiba ha trai duh kin ïakhun markylliang ha ka Relegation Round ha kawei ka madan, ban pynlong ha Deccan Arena ha Hyderabad.
Kiwei pat ki kynhun ki ban ïakhun ha ka Championship Round ki kynthup ïa ka Diamond Harbour (22 point) kaba wan ha khlieh duh, nangta sa ka Rajasthan United FC (17 point), ka Sreenidi Deccan FC (15 point), Chanmari FC (11 point).
Kawei pa kawei ka kynhun kiba pyndep ha ka Top 3 kin ïalehkai lai tylli ki jingïalehkai ha la ïing bad ka SLFC kan ïakhun pyrshah ïa ka Dempo ha ka Sngi U Blei, ka Chanmari FC ha ka 02 tarik Jymmang bad ka Rajasthan United ha ka 15 tarik Jymmang. Ki ar tylli ki jingïalehkai shabar kan long pyrshah ïa ka Sreenidi Deccan ha ka 10 tarik Jymmang bad ka Diamond Harbor FC ha ka tarik ban sa pynthikna kham hadien.
Ha ka Stage 2, ki kynhun kin bteng ryngkat ki poiñ ba ki la kamai ha ka Stage 1. Kane ka mut ba ka Lajong ka duna 5 poiñ shadien jong ka Diamond Harbour kaba ïalam hakhmat, kaba don mynta ha ka jingkyrmen ban rah ïa ka nam lahduh, nalor kata, ka lad ban ïohrung sha ka Indian Super League.
Ki kynhun ki ban ïakhun ha ka Relegation round jong ka IFL 2025-26 ki kynthup ïa ka Aizawl FC (9 point), Real Kashmir FC (8 point), Gokulam Kerala FC (8 point), bad ka Namdhari FC (7 point). Ki ar tylli ki kynhun kiba pyndep sha trai duh ha ka relegation phase, kin shah weng noh bad shah pynhiar kyrdan sha ka I-League 2.
