Ïoh jingmyntoi ki nongrep ïaka rukom rep snepkor katkum ka juk stad saian ha ka District Level Workshop ha USTM

Nongpoh, K’Lyngkot 13: Kum shibynta ban kyntiew ïaka rukom rep snepkor katkum ka juk stad saian ba mynta, ka Coconut Development Board, haka jingïatreilang bad ka tnad Rural Development jong ka skul bah USTM hynnin ka sngi kala pynlong da ka District Level Workshop ha skulbah USTM ban ai jinghikai sha ki nongrep ban thung bad rep ïa u snepkor katkum ka juk stad kaba mynta bala wan ruh ban shim bynta da ki spah ngut ki nongrep naka thaiñ Killing.
Ha katei ka prokram ai jinghikai u Dr. BK Das Pro Vice Chancellor ka skulbah USTM u la shim bynta kum u kongsan haka jingdonlang u Dr Papiya Dutta Associate Professor, Dr Sanjib Kr. Dutta Professor naka tnad Rural Development bad kiwei kiwei bad ha katei ka sngi la wan ban ai jinghikai da u Prof. Sarat Saikia, Principal Scientist ka HRS, AAU Kahikuchi Guwahati, Dr. Rajat Kumar Paul, Director ka CDB, bad ka Panchi Rajkhowa, Field Officer CDB, RO, Guwahati.
Ka jingthmu jong katei ka prokram ka long ban nang pynjanai bad kyntiew ïaka rukom thung bad rep snepkor ban pynmih ruh shibun u soh ban kyntiew ruh ïaka ïoh ka kot ki nongrep ha kaba lyngba katei ka prokram naka liang ki nongrep kila ïoh ruh ban ïa mir jingmut ban ïa tai halor ka rukom rep snepkor bad khmih lynti ba katei kan wanrah ka jingkylla kumno ban rep snepkor.
Naka liang ki nongkren ha katei ka sngi kila ai ka jingbatai bñiah sha ki nongrep kane ka rukom rep thymmai ïa u snepkor kan kyntiew bun shah naduh thung haduh ban da pynmih soh bad kane kan wanrah ka jingkylla ïaka rukom rep bad thung snepkor bad lyngba kane ka prokram ka Coconut Development Board bad ka tnad Rural Development ka ngeit ruh ba kane ka prokram kan long ka jingkyrkhu ïaki nongrep ha baroh ki liang.