Ïoh jinghikai kyrpang ki Rangbah shnong da ka prokram ka MSLSA, ban tip ïa ki lad jingïarap halor ki kam aiñ

Nongpoh, Lber 17: Kiba bun ki rangbah shnong ne ki nongïalam shnong ba hap ha ka Umling C&RD Block, Ri Bhoi District mynta ka sngi ki la ioh pdiang da ka prokram ai jinghikai kyrpang halor ki lad jingïarap ka sorkar kiba ïa dei bad ki kam aiñ, ba ka Meghalaya State Legal Service Authority ka la pynlong ïa kane ka prokram ai jinghikai ha ka hall jong ka ophis u Block Development Officer ka Umling C&RD Block.
Kane ka prokram ba la pynlong kyrpang la tip ruh kum kata ka ‘Increasing Access to Justice through Community mediation’ ha ka ktien nongwei bad ka jingthmu ka long ban pynioh ïa ka jingbishar ba hok ïa ki paidbah ha kano kano ka mokotduma bad ruh ki lad jingïarap ba la ai da ka sorkar.
Nalor ki rangbah shnong bad ki nongïalam shnong na ki shnong bapher bapher kiba la shim bynta ha kane ka prokram, ki nongai jingpynshai ha kane ka prokram ki kynthup ïa u T.T.M Sangma (MUS), Officer on Special Duty, ka MSLSA, ka Kong I. Lyngkhoi, Secretary ka DLSA Ri Bhoi District, u Bah Eric C. Dkhar, BDO ka Umling C&RD Block lem bad kiwei ki ophisar.
Kum ban shu kdew, ka jingthmu ka Meghalaya State Legal Service Authority ban pynlong ïa kane ka prokram, ka dei ka jingthmu ban pynsngewthuh ïa ki nongïalam shnong ba ki don ki khep ba ki lah ban ai ka jingbishar kaba hok katkum ba la pynkup bor ïa ki da ka ain (Customary Law) bad ruh ki don shibun ki bynta ba pynshai halor ki lad jingïarap na ka sorkar ïa ki paidbah kiba donkam ka jingïarap ban ioh ïa kata ka jingbishar kaba hok ha kino kino ki kam kiba ki ïa kynduh ha ka kam aiñ.
Ka prokram ai jinghikai ba la tip kum ‘Increasing Access to Justice through Community mediation’ ka dei ruh shi bynta ban pyntip halor kita ki legal aid scheme ba la buh da ka sorkar bad khamtam na ka bynta kito kiba ym kot bor ban buh nongïasaid aiñ haba don kino kino ki jaid mokotduma ba ka sorkar ka ai ïa kita ki nongïasaid aiñ ban ïa khun ïa ka hok jong ki hapoh kano kano ka ïingbishar.