Shillong, Lber 17: Da ka jingïatreilang hapdeng ki pulit bad ki shipai BSF la ïoh ban kem saw ngut ki khar Bangladeshi bad uwei u nong India ha South West Garo Hills District ka jylla Meghalaya.Ki pulit bad ki BSF haba la ïoh ïa ka jingtip ba ka la don ka jingwan rung ki khar Bangladeshi da kawei ka kali, ki shipai BSF bad ki pulit ki la pynlong ïa ka jingap ktem bad la ïoh ban kem ïa ki saw ngut ki khar Bangladeshi bad uwei u nongñiah Auto ba dei u nong India katba ki dang pyrshah ban rung sha India.
Na ka liang jong ki BSF hadien ba ki la pyndep ïa ki jingdonkam katkum ka aiñ hapoh ka jingpeit jong ki, ki la aiti noh sha ki pulit jong ka Mehenderganj ba kin leh ïa kaba donkam katkum ka aiñ.Na ka liang jong ki shipai BSF ki long kiba peitngor ban pynthikna ba kan nym don kano kano ka jingwan rung tuh jong ki briew na shiliang u pud sha India, kane ka jingïoh kem ïa kine ki sawngut ka dei ka jingïatreilang hapdeng ki BSF bad ki pulit.
