Khliehriat rymphang 22: Ki nongïalam bad ki dkhot jong ka Hynñiewtrep Achik National Movement Jaiñtia Zone, hynin ka sngi ki la ioh bat ïa ki briew bad la suba jur ba ki dei ki dkhar na Bangladesh kiba la wan rung beaiñ sha East Jaiñtia Hills District, ka seng ka suba namar kitei ki briew kim tip wat tang ïa ka jaka shong jaka sah ruh, kim don ruh ki kot ki sla kiba biang ban pynshisha ba ki dei ki nong India.
Ki nongialam ka HANM Jaiñtia Zone kynthup u President, u bah Mihsalan Thoo, u General Secretary, u bah Wankishwa Mawlong, ki ong ba halor kane ka jingioh rung kine ki briew, ka seng ka pynrem jur ïa ka jingtlot treikam ki khyrdop talasi mynder, ki Infiltration Check Gate kiba na ri Bhoi District bad na Ratacherra East Jaiñtia Hills Ditrict bad kyntu jur ba ki dei ban shim khia ban peit bha ïa ka jingrung jingmih ki mynder ba kaba kum kane kam dei shuh ban dang jia nangne sha khmat.
Ha kajuh ka por, ka seng ka ong ba ha shwa ban aiti ïa kine ki briew sha thanat, ka seng ka kwah ban pynsngew ba ka seng ka pynrem jur ïa ka company Dalmia kaba don ha East Jaiñtia Hills District kaba wanrah ïa ki nongtrei ki bym biang ki kot ki sla kiba lehse ki lah ban dei ki nong Bangladesh “Kine kiba wan rung beaiñ ki wan knieh ïa ka hok, knieh ïa ki kam ki jam jong ki trai shnong” ong ki nongïalam ka HANM-JZ.
Na ka liang ka seng ka kyntu jur ïa ka sorkar ba ka dei ban peit bha ïa baroh ki company kiba don hapoh ka district ba kiba wan trei na bar ki dei ban biang ki kot ki sla bad lada ka sorkar kam shim khia ka seng kan leh da kaba tyngeh bad leit ban khynra hi ïa ki kot ki sla jong baroh ki nongtrei bar jylla kiba trei ha company Dalmia ha Thangskai.
