Ka jingkyrni ha kino kino ki kam khamtam haba ïadei bad ki jingmlien ba sniew ka dei ka mat kaba baroh ki longiing longsem ki mad lut la ka long naduh kiba don ïa ki khun kynthei lane kiba don ïa ki khun shynrang. Kane ka jingkyrni kam thew ruh tang ïa kiba dang khie samla hynrei wat ha kito ki longiing kiba don tang kiba heh suda.
Kum ka nuksa, ka jingkhlaiñ ki social media ha kane ka juk ka la teh mraw bad long thik kumba teh da u kynjri ïa ka jingim jong baroh khlem mab shuh la ka long naduh kynthei ne shynrang ne naduh kiba dang rit haduh kiba la ïaw. Kane kam kut tang hangne ka jingkyrni ki khynnah ba dang khie ha ki jait games khamtam ki shynrang ka la ktah ym tang ïa ka bor pyrkhat jong ki hynrei ka pynjaituh bad ka pynlong ïa ki ban thait wat ban pynleit jingmut ha ki jingpule.
Kawei pat kaba ktah ïa ki ka long ba kim don por bad kim kwah wat ban don lang bad ki kmie kpa ne hynmen para pynban ki pynleit jingmut ha ki jingïalehkai jong ki. Kane ka pynlong ïa ki ban long kum kito kiba shu pang lynter taid nalor ba kim long pariah ne smat ban kren bad khana. Kane baroh kadei namar ka jingpynleit jingmut da ki kynta khamtam ha k apor miet bad teng teng haduh mynstep ha ki games jong ki.
Kaba kham i ma ka long ba kito kiba kyrni kim dei shuh tang kito kiba la kham heh hynrei wat kito kiba dang 9 snem ne 10 snem ruh ki la ngat lang hajuh ka shangkhawiah namar ki la ïohi ne kumba ïoh jinghikai na ki hynmen para ne ki paralok. Ka daw tynrai hi kadei naduh ba wan ka khlam COVID ba ki kmie ki kpa ki hap ban ai ïa ki mobile ïa ki khun ban leh ïa kita ki online class ka la long kumba hikai ïa ki kumno ban pyndonkam wat ïa kiei kiei kiba dei shabar jong ka jingpule. Teng teng ki kmie ki kpa bym da tip bha ïa ki social media ki nang kmen ban ïohi ba ki khun ki pynlut por ha ki mobile da ka jingtharai ba ki pule ïa ki jingthoh ba ai ki nonghikai phewse ka long markhongpong namar ki pynlut por ha ka peit phlim.
Nalor kine, ka jingmih bun ki rynsan social media ka khring ruh ïa ki khun samla ba dang khie wat ban ym lehraiñ shuh ïa la ka longrynïeng hynrei tang ban ïoh bun kita ki nongpeit lane kita ki follower ki leh shongshit lang. Haba phai pat sha ki samla shynrang, kaba kham i shyrkhei ka long ha ka jingleh shongshit ban ïa kynthoh ne ïa comment pathar ha ki rynsan social media khlem da pyrkhat arsien ïano kan ktah, shaei kan poi hynrei tang namar ka jingshongshit paralok la shu ïa leh kyndeh lang.
Ha kawei pat ka liang na ka bynta kito kiba kham duna ka ïoh ka kot, lehse ki khun ki hap ban pyrshang bun ki lad ki lynti tang kumno ban ïoh recharge khnang ba kin ïoh ban ïalehkai Games bad ruh ban ïoh pynlut por ha ki social media. Hynrei na bynta kiba kham biang ka ïoh ka kot, ka jingpyndait da ki wifi ka la nang pynsniew shuh shuh namar la shu ïohei beit ïa ka internet khlem da donkam khuslai mano ban siew.
Kaba kham i ma ka dei ruh ka jingbym don por shuh ki kmie ki kpa ïa la ki khun. Don ki longiing kiba ïa kynduh khun tang por bamja miet lane tang ha ki sngi Saitjaiñ bad sngi U Blei. Ka daw ka long ba ki khun ba leit skul ha sor naduh dang step ki la mih bad hadien ba wai skul ki hap beh sa ki jingleit tuition bad kat ba kin da poi iing la kot sha ka phra baje. Don ki khep ba ha kito ki longiing ba ïa trei lut bad Kmie bad kpa, la shu shaniah ha ki nongtrei ban pynbiang bam ne pynsong ja skul ïa ki khun namar kat ba kin khie thiah ki khun la poi sha skul. Kane ruh kadei shi bynta ba ki khun kim ïoh por shuh bad ki kmie ki kpa bad bun na ka por jong ki la pynlut ha skul nangta ha ki jaka leit khreh kot bd ruh bad ki paralok.
Dei ruh ha kum kine ki jingjia ba ki kmie ki kpa ki ai pahuh ka bai thep pla ïa ki khun ba kin bam kin dihsha ha ki dukan khnang ba hadien ba la wai skul kin leit beit sha jaka khreh kot. Lada jia ba dei khynnah tipsngi ka pisa kan ym bakla lynti hynrei lada jia pat ba ngat ha kiwei kane kan pynkylla khongpong bad pynjot thiaw ïa ka jingim jong u khynnah skul bad ka lah ban poi haduh u pud ba kin ngop ha kiwei ki jingdih kiba sniew kiba kynrei ha kum kine ki por mynta kum u drok, ki biri sikret lane wat ha ka kyiad ruh.
Ka lawei nangne shakhmat ka dang kham shyrkhei shuh shuh da ka jingnang syrtok ka jingkyrduh kam bad lada jia lei lei ba ym don sa ki lad ki lynti ban ïakhun ïa kane, ka lawei ki samla ka don hapdeng ka jingma kaba khraw kaba kin kham bun ka por bad ki paralok bad ha ka jingkhluit ka snam lada don ïa bun ki lah ban leh ruh bun ki jait kam nalor ba ki kloi ruh ban ngop ha bun ki jingsniew.
