Nongpoh, Ïaiong 03: Ki nongïalam ka Khasi Student Union, (KSU) Umsning Circle hadien ka jingïoh jingtip halor ka jingthmu ïaid lynti jong ki suba nong Bangladesh lyngba ka surok National Highway 06, kumta ki nongïalam ha ryngkat ki dkhot ka seng ki la pynap shrip ïa kawei ka sumo bad ban ïoh bat ruh kumba 11 ngut kiba dang thmu ban leit rung shapoh sor Shillong.
Ki nongïalam ka KSU, ha ka jingïalam da u samla Jester Nongbet, Assistant Organizing Secretary ka KSU North Khasi Hills District, lem bad ki dkhot ka Umsning Circle ki la ïoh ban bat ïa kawei ka sumo ML 04 B 7082 ha ka 2 tarik Ïaiong ha ka por 2 shiteng eiei nohphai sngi bad ïoh bat ïa ki 11 ngut ki nong Bangladesh ha kaba ki la leit ban aiti sha ki pulit ka Umsning Police Outpost ban leh ïa kaba donkam katkum ki kyndon ka aiñ.
Na ka liang ka seng, ka la maham jur ïa ki briew kiba donkti ban pynrung tuh ïa kine ki nongBangladesh sha kane ka ri India bad ka jylla Meghalaya, da kaba kynthoh ba kane ka jylla kam dei ka jaka bret niut ban shu wan bret ïa ki briew ba nabar. Ka seng ka la dawa ruh ïa ki bor pulit ba kin pyntikna ba kine briew ki dei ban leit phai sha la ka ri ym ban leh buit tuh ban rung sha Nongbah Shillong.
Kine ki nong Bangladesh kiba la shah bat ki kynthup ï aka Sajauddin Sheik (26), Panna kamal Husein (37), Rabia Begum (27), Kakoli sherda (36) snem, Erina din Mullah (30), Shobha Islam (28), ka Unjilla Sardar (27), Poppi Mullah (25), Sonia Sheik (21) lem bad arngut ki khynnah kiba hapoh 15 snem ka rta.
