Pynlong ka ophis Soil and Water Conservation ïa ka prokram Watershed Yatra ha shnong Mukhap
Jowai, Ïaïong 03: Ka ophis jong ka Soil and Water Conservation Office, Jowai Territorial hynnin ka sngi 1 tarik u Ïaïong ka la pynlong ïa ka prokram Watershed Yatra ha ka shnong Mukhap, Laskeiñ C&RD Block, West Jaiñtia Hills, shi bynta na ka Pradhan Mantri Krishi Sinchayee Yojana (PMKSY) – Watershed Development Component (WDC) 2.0.
Hashwa ban sdang ïa kane ka prokram la don ka jingkaweh ïa ka lama da u ma L. Pohktai DS&WCO, Jowai Plantation Crop bad u ma T.War DS&WCO, Jowai Territorial.
Kane ka Watershed Yatra ka long shi bynta ban ïarap kumno ban pynneh pynsah ïa ka wah, ka jingtwa khyndew bad ban pynshna ïa ki jaka saitjaiñ kiba hap hapoh ka PMKSY-WDC 2.0’s
Ha kane ka prokram la wan ban donlang da u MLA ka Mookaiaw Constituency ma Nujorki Sungoh, Doloi of Elaka Raliang ma C. Lyngdoh, ma W. Passah, Sr. AS&WCO, ki nongtrei ka Soil and Water Conservation Office, Jowai, nalor ki Waheh Shnong, ki member ka Watershed Committee, ki Self Help Groups bad ki khynnah skul.
U ma Nujorki Sungoh haba ai jingkren kum u kongsan ula pynsngew ba ka jylla Meghalaya ka long kaba la kyrkhu ha ka jingriewspah jong ka mei mariang kaba itynnad, kaba don ruh ïa ki law kyntang bad ki mrad ki mreng ba lai phew jait. Ula buh ka jingkyntu kum ki nongshong shnong ka jylla ki donkam ban pynneh pynsah ïa kine ki khlaw na ka bynta ka lawei bad ka pateng ban wan.
Katba u ma T.War, ula ai jingkren halor ka jingdonkam ban kynshew ïa ka um slap bad ki tyllong umbam umdih.
Shi bynta na kane ka Watershed Yatra, katei ka ophis ka la pynlong ïa ki prokram bapher bapher, ka jingpyni ïa ka Video Clip halor ka Watershed Yatra kum ka dak ban ai jinghikai sha ki paidbah, ha kane ka sngi ka la don ruh ka jingsam ïa ki khusnam sha kito kiba sumar bad pynbha ïa ki wah.
La don ruh ka jingïalehkai Short Skit halor ka Protection of Land and Water Resources, kumjuh ka jingshad tynrai na ki SHGs. Nangta ka jingïakop kyntip Quiz ba la shim bynta da ki khynnah skul bad la sam ruh ïa ki khusnam.
Baroh kiba wan sha ka prokram ki la shim bynta langba ka jingpynkhuid (Cleaning Drive), ka jingthung ïa ki tynrai dieng bad la pynkut ïa ka prokram da ka jingput jingtem bad ka jingrwai na ka Shangpung Traditional, ka jingpynher ïa ki diengkum nalor kiwei kiwei de.