Mawkyrwat, Ïaïong 03: Kum shibynta jong ka jingaimynsiem bad ïarap na ka bynta ki samla pule kiba don ka thong ban don ka jingïakhun ha ki jingïaleh eksam bapher bapher ha kum kine ki sngi, na ka liang jong ka Laweibankyrshan Cluster Level Federation (CLG) ha kine ki khyndiat sngi ka la ïoh ban plie paidbah ïa kane ka coaching center ha kaba u bah B. Mawlong, IAS, Deputy Commissioner jong ka South West Khasi Hills District u long kum u kongsan.
Lah ban kdew ba ïa ka Laweibankyrshan Cluster Level Federation (CLG) Coaching Center la kyrshan da ka Star-up Village Entrepreneurship Program (SVEP), BMMU, MSRLS bad ka Mawkyrwat C&RD Block bad ïa kane ka center ïa mynta yn pynlong shwa hapoh ka Hall jong u Block Development Officer jong ka Mawkyrwat C&RD Block.
Haba kren ha ka jingïalang, u bah B. Mawlong, IAS, Deputy Commissioner jong ka South West Khasi Hills District u la ong ba kane ka jingplie ïa kane ka ‘Coaching Centre’ ka long kaba donkam haduh katta katta namar kum ki samla haba ki wat ïa ki kam ki jam shane shatai bun na ki ki dang shem jingeh ban leh bha namar lah ban ong ba ha kine ki sngi ba mynta bun sa tang ki jingïakop ne competition. Kumta da ka jingplie jong ka Laweibankyrshan Cluster Level Federation (CLG) ïa kane ka ‘Coaching Center’ kan sa long ka lad ka lynti na ka bynta jong ki samla ka dong ka thaiñ.
Ha kajuh ka por u la ong ruh ba kane ka sngi, ka pynkynmaw ïa u ïa ki snem ba la leit noh ha kaba ma u ruh u la don bynta ha kum kine ki jaka jong ka jingshah hikai ha ka por ba u dang don ha ka lynti jong ka jingïakhun bad ïaleh ïa ki eksam bapher bapher. Namarkata, lyngba ka jingplie ïa kane ka ‘Coaching Centre’ kan sa long kawei na ki lad ban ïarap na ka bynta ki khun samla jong ka South West Khasi Hills District kiba don ka jingthmu ryngkat ka mynsiem jong ka jingïaleh ban ïa khun ha ki eksam kum ha ka MPSC, SSC ne wat ha ka UPSC bad kiwei de.
Kumta na ka liang jong u bah B. Mawlong, IAS, Deputy Commissioner jong ka South West Khasi Hills District u la ai mynsiem na ka bynta ki khun samla kiba don ka jingthmu ryngkat ka mynsiem jong ka jingïakhun ha ki eksam bapher bapher ba kin shim kabu ïa kane ka Coaching Centre khnang ba kan long ka jingmyntoi na ka bynta ka lawei jong ki bad ba ki dei ruh ban da minot ne pynleit jingmut khnang ba ka jinghikai kan nym long kaba leh noh ei.
Ha kajuh ka por na ka liang jong u bah Mawlong, IAS u la ai jingmut ïa ka Laweibankyrshan Cluster Level Federation (CLG) ba haba ka don ïa kane ka jingthmu ba bha ka dei ban kham pynlut kyndiat kum kaba pynbiang ïa ki shuki kiba don ruh bad ka miej ba rit khnang ba kiba wan sha ka jingshah hikai kin kham suk ha ka ban buh ïa ki kot ki sla bad ymtang kata ka dei ruh ban buh ym tang ka jinghikai hynrei wat ka jingïasyllok ne jingkdew lynti na ka bynta ki khun samla ba ki dei ban ïaid ïa ka lynti ban don da ka jingthmu ban pynpoi beit sha ka jingjop.
Ha kane ka sngi plie pyrda la don lang naduh u bah I. Lawryniang, MCS, Block Development Officer jong ka Mawkyrwat C&RD Block, u bah Eson Kharrymmai, District Mission Manager jong ka National Rural Livelihood Mission ha Mawkyrwat lem bad kiwei de ki ophis ryngkat ruh ki dkhot ka Laweibankyrshan Cluster Level Federation (CLG).
