Nongpoh, Ïaiong 03: Ban plielad bad ban ai ïa ka rynsan na ka bynta ki khynnah skul ban pynpaw ïa la ki sap ha ka kam ïalehkai sport bapher bapher, nalor ka pule ka puthi kaba ki pulynlut por haki saw kynroh jong ki kamra klas, na ka liang ki bor pynïaid skul ka Sati Raja Memorial Secondary School Umsning Patarim mynta ka sngi ki la plie pyrda noh ïa ka Inter House Annual Sports meet 2025 ba 3 sngi lynter ha madan ïalehkai ka skul.
Ïa katei ka Annual Sports Week la wan ban plie pyrda bad ban ai mynsiem da u Samla Gabriel Sun President ka FkJGP Umsning Circle, ka Kong Balakyntiew Umbah Head Mistress ki kmie ki kpa, ki khynnah skul lem bad ki nonghikai jong kane ka skul.
Ha ka sngi plie pyrda ïa kane ka Annual Sport Meet, la sdang shwa da ka jingïaid ïa ka March Pass ba la shimbynta da ki khynnah skul jong ki house bapher bapher, la pynbud pat da ka jingthang ïa ka sharak kum ka dak ban bud thik ïa ki kyndon ïalehkai sport ryngkat ka jingbam smai da ki khynnah skul bad pynphuh phieng ruh da ki jingrwai, jingshad bad mass drill bala shim bynta da ki khynnah skul.
Ha katei ka juh ka sngi na ka liang ka FKJGP ka la aiti ruh da ki ben ki desk sha ki bor pyniaid skul ba kin ïoh ban pyndonkam haki kamra klas bad kumjuh ruh ki umsoh ban sam sha ki khynnah skul ha katei ka sngi ba ki pynlong iaka sports meet.
Haba kren ha katei ka sngi na ka liang u Samla Gabriel Sun kum u nongïalam ka FKJGP ha Umsning u la pynpaw ka jingsngewkmen ban don bynta lang bad ki khynnah skul ha katei ka sngi lehkmen jong ki ban shim bynta shitrhem haki jinglehkai sports bapher bapher hadien ba ki la pynlut bun ka por haki 4 kynroh jong ki kamra klas.
U la ong ruh ba kam ïalehkai ha kane ka juk mynta kam dei tang ka kam ki lan met hynrei ka dei ruh ka lad ïohkam ïohjam jong ki khun samla kiba don shisha ka sap ka phong da kaba ai nuksa ruh ïa ki khlur ïamareh thong bad ki khlur lehkai bapher bapher ka pyrthei kiba long ka jingai mynsiem ïa kiba bun bad kyntu ruh ïa ki ba ki dei ban pyndonkam hok ïa ka sap ka phong jong ki bad kyrmen skhem ba shisien ka sngi kin sa long briew ha ka jingim jong ki.
