Nongpoh, Ïaiong 18: Wat hapdeng ka jingmaham naka por shaka por ïaki paidbah ban nym thang khlaw dusmon ha kum kane ka por shit bad ka por tyrkhong, kaba lah ban wanrah ki jingjia ba sngewsih bad ki jingbam duh ding ïaki khlaw ki btap bad ki jingthung jingtep, hynrei ka jingthang dusmon ki briew bym lah ban ithuh ka dang bteng bad ha kawei ka jingjia thang khlaw kawei ka khlaw thung siej jong ka Ri-Bhoi Tourism and Environmental Development Forum (RBTEDF) kaba don haka shnong Umskun ha Ri-Bhoi, kala ingkhong khaid bad kumba 2000 tynrai eiei ki siej kiba la don kumba 1 snem tam ka jingheh kila duh noh naka jingbam duh jong ka ding.
Haba kren sha ki lad pathai khubor mynta ka sngi ha Nongpoh, u Bah Plielad Tiewsoh Chairman ka RBTEDF u la pynpaw ka jingsngewkhia kaba jur halor katei ka jingjia kaba la jia haka miet jong ka 12 tarik mynta u bnai ha kaba ka ding kala klang ban bamduh ïa katei ka khlaw thung siej jong ka RBTEDF kaba ka dang shu dep ban thung ïa u siej kumba 4 hajar tynrai ha u snem bala dep, hynrei na katei ka jingbam duh ka ding mar shiteng na kitei ki tynrai siej kila ingkhong bad donbok da ka jingïarap jong ki nongrep na katei ka shnong la lah ban tem bad pynlip noh ïaka ding bad kam shym la iohlad ban bam lut ïa katei ka khlaw.
U la ïathuh ruh ba kitei ki siej kila don kumba 2 lane 3 phut ka jingjrong, kaba dei ruh ka project thungsiej bala bei tyngka da ka North East Cane and Bamboo Development Council) jong u snem 2021-22.
Naka liang ka Forum kala kyrpad ruh ïaka sorkar jylla lyngba ka tnad Forest bad kumjuh ruh ïaka NECBDC ba kan phai khmat naka bynta kino kino ki lad jingïarap khnang ba yn lah ban thung bujli biang ïaki siej ha katei ka khlaw, u la bynrap.
