Ïasnohkti ki bor pynïaid ka WKH ha ka mock drill ba la pynbeit da ka sorkar jylla
![](https://mawphor.com/wp-content/uploads/2022/05/mawphor-1.jpg)
Nongstoiñ, Risaw 12: Ha ka sngi palei jong ka taiew, ka Meghalaya State Disaster Management Authority (MSDMA) ha ryngkat ka jingïatreilang bad ki Bor Synshar Distrik ka West Khasi Hills District, ki la pynlong ïa ka Mock Drill Exercise kaba ïadei bad ka jingkhih Jumai hapoh Nongstoiñ, kaba long ruh shi bynta jong ka State Level Mock Exercise.
Ka jingthmu ka long ban tip la ki Bor synshar Distrik ki la pynkhreh ne em lada wan lynshop ki bor mariang kum U Jumai. Ha kajuh ka por ka long ruh kum ka jingai jinghikai sha ki paidbah nongshong shnong, ba kumno kin leh lada wan jïa ki bor lynshop jong ka mariang hapoh ka distrik.
Ïa kane ka drill exercise la pynlong ha ryngkat ka jingïatreilang bad kiwei pat ki tnad sorkar kum ka State Disaster Response Force (SDRF), Fire and Emergency Services, Police, Health Department, Civil Defense, AADPA Mitra volunteers, ki skul bad kolej kiba don hapoh jong ka distrik.
La sdang ïa ka drill da ka jingpynpah siren bad ki district officer wut wut ki la thaw ïa ka emergency respond protocol bad ban ïatreilang bud sa da ki kynhun pyllait im, kiba la leit sha man la ki jaka ba la pynlong ïa kane ka mock drill, na ka bynta ban ïoh pyllait ïa ki briew bad ïa ki jingri jingdup sha ki jaka kiba long shngaiñ.
La ïoh ruh ban thaw ïa ka relief bad medical camp bad kiwei kiwei ha madan ïalehkai jong ka skul St Peters Higher Secondary School Pyndengrei, na ka bynta ban ïoh ai jingïarap sha ki shnong ki thaw kiba la shah ktah ha U Jumai.
U Deputy Commissioner ka West Khasi Hills District u ba long ruh u Chairman ka DDMA bah Garod LSN Dykes IAS, u la ong ba ka jingthmu kaba hakhmat eh jong kane ka Mock Drill ka long ban pyntikna ba lada wan kino kino ki jingjia shah lynshop ka mariang, ha kaba lah ban ai ka jingïada ïa ki paid nongshong shnong.
U la pyrto ïa ka jingïatreilang jong ki tnad sorkar kiba pher, ki shnong ki thaw bad ki paidbah baroh kiba la pynlong ïa kane ka Mock Drill Exercise kaba jop.