Shillong, Risaw 12 : Ka jylla ka la pynkhreh mynta ban pynlong ïa ka International Tourism Mart kaba 11 naduh ka 21tarik Naiwieng haduh ka 23tarik utei u bnai.
Haba pyntip ïa kane, u Myntri ka tnad Tourism ka sorkar jylla, Bah Paul Lyngdoh u la ïathuh ba ha katei ka tamasa kaba lai sngi, ka jylla kan ïoh ban pyni nam shibun kiei kiei kynthup naduh ki jingshna kti kiba mih na kane ka jylla nalor ba kan long ruh ka jaka pdeng na bynta ki nongjngohkai pyrthei ba kin wan ïohi ïa ka jingitynnad ka mariang ha ka jylla.
“Ha katei ka lympung ngi khmih lynti ïaka jingwan shim bynta shitrhem na baroh ki jylla jong ka thain shatei lam-mihngi jong ka ri bad wat kiban wan na kiwei ki ri ruh kumjuh,” u la ong da kaba bynrap ba u Myntri ka tnad Tourism ka sorkar pdeng, u GK Reddy u la pyntikna ba un wan plie kum u Kongsan.
U Myntri u la ïathuh ruh ba katei ka lympung kan dei kaba kongsan tam na bynta ka jylla namar kan dei ha ka sien kaba nyngkong ba ka jylla kan ïoh ban pynlong kum shi bynta ban kyntiew ïa ki kam jngohkai pyrthei.
