Pynlong ka SBI Nongpoh Branch ïa ka Smart Agri Customer meet ban kyntiew ïa ka kam rep kam riang
Nongpoh, Jylliew 23: Ka State Bank of India (SBI) Nongpoh Branch mynta ka sngi ka la pynlong ïa ka SBI Smart Agri Customer Meet ha Risai Conference Hall, Nongpoh, kaba dei ka jingïalang kaba la wan shim bynta da ki nongrep, ki nongseng kam lajong, ki ophisar sorkar bad ki heh ophisar jong ka SBI ban ïakren halor ki lad ki lynti ban kyntiew ïa ka kam rep kam riang katkum ka juk stad bad ka juk teknoloji ba mynta.
Ka thong jong kane ka jingïalang ka long ban pynshlur ïa ki nongrep ba kin pyndonkam ïa ki rukom rep kiba thymmai bad kiba neh slem (sustainable agriculture) khnang ba kin lah ban pynkiew ïa ka jingïoh jingïarap bad ka ïoh ka kot jong ki longïing nongrep. Ha kajuh ka por, la thmu ruh ban wanrah ïa ka jingkylla ha ki shnong nongkyndong lyngba ka jingkyrshan ïa ka kam rep kam riang.
Ha kane ka sngi la wan shim bynta da u Ejaz Ahmad, DGM (B&O) ka SBI, ka Kong Serolyne Chyne, District Agriculture Officer ka Ri Bhoi, u Pradeep Kumar Bora, Professor ka Central Agricultural University, bad u Dr. H. Talang, Senior Scientist ka Indian Council of Agricultural Research, nalor kiwei pat ki ophisar ka SBI.
Haba ai jingkren ha kane ka jingïalang, ki riewshemphang bad ki ophisar ki la ban jur ba ka jingkiew jong ka kam rep kam riang kam lah ban urlong tang da ki nongrep, hynrei ka donkam ïa ka jingïatreilang hapdeng ki nongrep, ki tnad sorkar, ki jaka pule bad wad bniah bad ruh ki nongbei pisa kum ki bank.
Ki la kyntu ruh ïa ki nongrep ba ki buit thymmai ki long kiba donkam ha kane ka juk mynta ban kyntiew ïaka kam rep, ban pyndonkam ïa ki teknoloji kiba tbit bad shim kabu ïa ki skhim jingïarap bapher bapher kiba don na ka sorkar bad ki bank ban kyntiew ïa ka jingïoh jingïarap jong ki.
Kum shi bynta jong kane ka prokram, ka SBI Nongpoh Branch ka la sam ruh ïa ka SHG Sanction Letter sha kawei ka kynhun Self Help Group (SHG), kaba long ka jingïarap pisa na ka bynta ban pynheh bad pynroi shuh shuh ïa ki kam rep kam riang bad kiwei ki kam kamai jong katei ka kynhun.