Ïarap ka IORA Ecological Solution ban ïoh kamai pisa ki nongrep na ka Carbon Finance

Shillong, Rymphang, 11: Ka IORA Ecological Solution ha ka sngi Baar ka la pynpaw ïa ka mon ba kan dang bteng ïa ka jingïatreilang bad ka Sorkar Jylla lem bad ki lai tylli ki Autonomous District Councils (ADC) ha ka jylla.
Ïa kane la pyntip da u CEO jong ka IORA u Swapan Mehra hadien ka jingïakynduh ïa u Chief Executive Member jong ka KHADC u Bah Pynïaid Sing Syiem.
Haba kren sha ki lad pathai khubor, u Swapan Mehra u la ong ba ka IORA ka la ïatreilang bad ka Sorkar Meghalaya lem bad ki lai tylli ki Autonomous District Council ba kynthup ïa ka KHADC, JHADC bad GHADC ban ïarap ïa ki briew khamtam ïa ki nongrep ban ïoh ïa ka dor kaba biang lyngba ka Carbon Finance.
U Mehra u la ong ba ka IORA Company ka la ïatehlok ruh bad ka Bank ki nongrep kaba heh tam ha ka pyrthei kaba don ha ka ri Netherlands, ka Rabo Bank ban pynurlong ïa kane ka prokram ha ka jylla Meghalaya. “Kane ka jingthmu ka long ban pynmih pisa na ka Carbon ba nyngkong eh ha 2-3 bnai ki ban sa wan,” u la ong.
“Ïa mynta ngi la don lypa kumba 19,000 hektar ka jaka bad kumba 9,000 hajar ngut ki nongrep ha ka Digital Platform bad ka thong ka long ban kyntiew shuh shuh sha ka 100,000 hektar khnang ba ki nongrep kin dup lah ban kamai pisa lyngba ka Carbon Finance” la ïathuh u Mehra.
U Mehra u la ong ruh ba ïa mynta ka IORA ka trei ruh bad kiwei kiwei ki nongbei pisa na ka ri USA kynthup ïa ka USDC bad kiwei kiwei ki Bank kiba kloi ban bei pisa ha Meghalaya. Ha kajuh ka por, u Bah Pynïaid Sing Syiem u la ong ba ka District Council ka la ïatreilang bad ka IORA mynta la shi snem ban pyntreikam ïa ka Agro Forestry Carbon Finance Project.
U Bah Pynïaid u la ong ba ka kompeni ka la ai bha ïa ka jingïarap ban pynsngewthuh bad ban ai jinghikai pyntbit ïa ki nongrep kumno ban ïada ïa ka mariang bad khamtam eh ïa ki nongrep ba kin ïoh jingmyntoi lyngba ka Payment for Ecosystem Services Scheme ïa kaba la pynbna da ka Sorkar Jylla.
U la ong ba ka KHADC ka thmu ruh ban pynjlan shuh shuh ïa ka jingtreikam bad ka International Finance Development (IFD) ha ka ri USA.
Kum ban shu kdew ba ka jingsiew na ka bynta ka Ecosystem Services Scheme ka la ai jingmyntoi ïa ki nongrep lane ki shnong lyngba ka jingïarap pisa kaba T. 8,000 shi hektar ha ka shi snem na ka bynta lai snem.
Hapoh kane ka skhim, yn ai jingkyrshan pisa tam sa T. 5,000 shi hektar ha ka shi snem sha ki khlaw ba la register kum khlaw shnong hapoh ka tnat Forest bad T. 2,000 shi hektar sha ki khlaw ba la ithuh kum ki Law Kyntang.