Shillong, Rymphang 10: U Myntri ka tnat Pule Puthi ka sorkar jylla u Rakkam Sangma ha ka sngi Nyngkong u la pynpaw ka jingsngewskhem ba ki khynnah pule kin lah ban leh bha ha kane ka eksam Secondary School Leaving Certificate (SSLC) kaba la sdang ha kane ka sngi naba ki la don bun ki kam ba la sdang ba la shim da ka sorkar jylla.
“Ngi khmih lynti ba mynta ka por kin lah ban leh bha naba ngi la sdang bun ki programme ban pynshlur bad ïarap ïa ki khynnah pule,” ong u Sangma haba kren bad ki lad pathai khubor.Haba pynpaw ïa ki jingkitbok kitrwiang sha baroh ki khynnah pule kiba ïakhun ïa ki eksamin SSLC bad HSSLC, u Myntri Pule puthi u la ong, “Ha kane ka snem ki la don haduh 64,387 kiba ïakhun ïa ka eksam SSLC 2025 bad 29773 kiba ïaleh na ka bynta ka HSSLC. Namar kata nga kwah ban phah ïa ka khubor kitbok bad ki jingduwai sha manla iwei pa iwei ba kin lah ban wan shakhmat bad leh bha.”
“Ha kine kiba la dep ka jingmih na ki result SSLC kam shym long kaba bha bad haduh kata ka kyrdan. Ha kawei ka liang ki pynshlur bad kyntu ïa ki skul bad ki khynnah pule ba kin leh bha bad kadei ka jingkyrpad jong nga ïa baroh ki khynnah pule ba kin klet baroh, ieh shwa sharud la ki dei ki mobile game, television bad kiwei ki jingpynbyrnia, ki dei ban pule bad leh bha, naba kane kadei ka khyllipmat kaba kongsan bha ba kin pynkylla ïa ki jingim jong ki shyrta.” Haba kylli, u Sangma u la ong ba ki skul ha ka nongbah ki la leh bha bad ki jingeh pat ki dei ki skul sha thaiñ nongkyndong, da kaba bynrap, “Ngi khmih lynti ba ngin lah ban lehbha da kine baroh ki kam ba la sdang khnang ban lah ban ïarap ïa ki.”
Da ka jingsdang ki kam pule jong une u snem, u Myntri u la ong, “Ngi la dep ban bthah ïa ki DC, DSEO ban jurip bad leit jngoh ïa ki skul naba ki don bun ki bym don nonghikai. Ba kin poi sha ki skul bad ban pynshlur ïa ki. Ngi kyrpad ïa baroh ki ophisar ba kin leit sha baroh ki skul da kaba leit jngoh ha kano kano ka por bad ban pynshlur ïa ki bad ban ai mynsiem. Kane kan long shisha ka jingwanrah ka jingkylla na ka bynta jong ki.”
