Nongpoh, Risaw, 20: Lai ngut ki samla naka shnong Nongjri, Ri-Bhoi District ki la shah syllad ha kawei ka trok ka bym lah ban ïoh ïa u registration number hynnin ka miet sngi Saitjaiñ katba ki dang ïaid lynti ban leit phai sha la iing.
Arngut kiba ïadei shi para ki la khladnoh na kane ka sla pyrthei kaba uwei pat u la mynsaw malu mala. Ki ar ngut ki samla kiba la khlad noh kiba dei ruh shipara trai la tip kyrteng kum u Borlin Marngar, 26 snem bad u Jobinson Marngar 21 snem kiba shong basah ha ka shnong Nongjri katba uwei pat uba la mynsaw la tip kyrteng kum u Bah Rangbashlur Malieh 30 snem na ka shnong Nongjri.
Kane ka la jia ha ka por kumba 12:00 baje shiteng synñia ha ka shnong Umsohlang ha kaba kawei ka trok bym lah ban ïoh ïa u registration number ka la tynrah beit ïa kine ki lai ngut ki samla bad phet krad hadien ba dep tynrah.
Ïa kine ki lai ngut la pynkit marmar sha Umsning CHC hynrei ki doctor ki la pynbna ba ki arngut shipara ki la khlad noh shuwa ban poi sha Hospital.
Ïa ka met jong ki arngut shipara la rah noh sha Nongpoh Civil Hospital na ka bynta ban pyndep ïa ka post-mortem bad hadien ba la pyndep ïa ki kyndon jong ka aiñ la aiti noh ïa ka met sha ki bahaïing hasem ban pyndep ïa ka jinglehñiam ba khatduh bad ki Pulit ki dang pynlong ïa ka jingtohkit ban lap dien ïa ka trok.
