Iamir jingmut ki heh sorkar kumno ban ïada lada jia ka jingkhynñiuh jumai ba jur

Shillong, Risaw 10 : Ka Sorkar Jylla mynta ka sngi Ba-ar, ka la pynlong ïa ka jingïamir jingmut bad baroh ki Kynhun bapher bapher kumno ban pynkhreh lypa ïa ki lad jingïada la jia ka jingkhynñiuh jong u jumai.
Kum shibynta jong ka State Level Mock Exercise halor ka jingpynjulor u jumai ka ban long ha ka 12 tarik Risaw, ka Meghalaya State Disaster Management Authority (MSDMA) ka Tnad Revenue ha ryngkat ka National Disaster Management Authority (NDMA) ka Sorkar India, ki la pynlong ïa ka Table Top Exercise mynta ka sngi bad ki Kynhun bapher bapher ha State Convention Centre, kaba la ïashim bynta ruh da baroh ki bor District da ka kor Online.
Ka thong bad ka jingthmu jong ka Mock Exercise ka long ban bishar bha ïa ka Disaster Management Plan bad ki Standard Operating Procedure (SOP) jong ka Jylla bad ki District bad ruh jong ki Tnad bapher bapher, kaba batai ïa ki kamram bad jingbah khlieh jong ki kynhun kat kum ka Indicent Response System (IRS), ban pynthikna ïa ka jingïatrei lang hapdeng ki Emergency Support Function (ESF), ban pynsngewthuh ïa ki paidbah nalor kiwei kiwei.
Lah ban kdew ba ka State Level Mock Exercise on Earthquake Disaster kan long ha ka 12 tarik Risaw ha baroh ki District ka Jylla.
ïa kane ka Table Top Exercise la pynïaid da u Sanjay Goyal, Commissioner & Secretary ka Tnad Revenue & Disaster Management ha ka jingïadonlang u Maj. Gen Sudhir Bahl (Retd.), Senior Consultant (ME & IRS), NDMA.
Ha kane ka Exercise, ka la don ruh ka jingai jingbatai ba bniah da ka MSDMA, DDMA (East Khasi Hills), ka Tnad PWD (R&B) bad ka NDRF. Ki kynhun bapher bapher bad kumjuh ruh ki District ki la pashat ïa ki jingai jingmut halor ki jinglong jingman bapher bapher.
Haba kren ha ka jingïalang, u Sanjay Goyal ula ban jur ba ka Meghalaya namar ba ka dei ka Jylla kaba khynñiuh bha u jumai, ka jingpynleit jingmut ba hakhmat eh nalor kiwei ki jingpynjulor ka mariang, ka dei beit halor ka jingpynkhreh ia kiei ki ban jia ha ka jingkhynñiuh jumai.
Ula kyntu ïa ki kynhun bapher bapher ba kin shim khia bha ïa ki exercise baroh bad ban tynjuh ïalade ba haduh katno ka Jylla ka la pynkhreh ban tem ïa kum kine ki jingjia.