Ym don jingeh ïa ka sor Shillong, pynpaw ka World Bank hadien ba wan jurip ïa ka Marten

Shillong, Risaw 10 : Ki heh ka World Bank hapoh ka jingïalam jong u Thierry Martin, Senior Urban Development Specialist ki la pynpaw ba kam don jingeh ïa ka Sor Shillong ban ïoh biang ïa ka nam kum ka Scotland of the East ha ka jingkhuid jingsuba, ong u CEM ka KHADC, Bah Pynïaid Sing Syiem.
Ïa kane u la pynpaw hadien ba ki heh ka World Bank ki la wan ban jurip kylleng ki jaka kynthup naduh Umkhen ha Them Basuk, nangta ka jingkynduh bad ka Dorbar Shnong Umpling, Mawlai Mawroh bad ruh ha Marten kaba dei ka jaka theh jaboh jabain na kylleng ka nongbah Shillong.
“Ki la pynpaw ba kim ïohi ban don jingeh ba ka Sor Shillong shisien ka sngi kan sa long biang ka sor Shillong kaba khuid ba suba kumba la bna nam mynshwa kum ka Scotland of the East. Ngi ruh na ka Council ngin ïa trei shitom watla ngin ym lah shimiet shimet ban pynkylla watla bun kin khmih lynti ban wanrah jingkylla noh ha ka shibnai arbnai,” ong u Bah Pynïaid bad ki lad pathai khubor hadien ka jingjurip ïa ka marten.
Shwa kane, u Bah Pynïaid u la ong ruh ba mynta shibnai kin ïakhun tyngeh ban shana bad thaw ïa ki kyndon kiba ïadei bad ka jingkhuid jingsuba kaban ïahap bad ka riti synshar naduh District Council, naduh ki It ki Hima haduh ki shnong ki thaw.
U CEM u la ïathuh ruh ba hadien ba ka World Bank ka la mynjur ban bei tyngka bad kyrshan ïa ka Council na ka bynta ban ïakhun ïa ka jingsatah ki jaboh jabaiñ ha ki shnong ki thaw, mardor ki la rai ban ïaid shakhmat ïa ka projek kaba nyngkong ha Mawlai Mawroh kaba ki tip kum ka Resource Recovery Centre, lane ka jaka ba kin pynïakhlad ïa ki jaboh kiba pyut bad kibym pyut. Nangtei ïa ki jaboh ba pyut kin pynlong sboh bad ïa ki bym pyut pat kin sa die.
Na bynta katei ka RRC ha Mawroh, ka Council ka la rai ban ai 50 lak bad hadien kane pat kin sa jied shuh sa katto katne ki centre kylleng ki jaka.
“Lyngba kine ki RRC kan ïarap ïa ka ïoh ka kot jong ki briew ha kito ki shnong la ka long naduh ki SHG, ki samla lane ki nongshong shnong namar kane ka lah ban long ka lad kamai jakpoh,” u la bynrap biang.
Katkum ka jingong jong u, ha kitei ki RRC, kan ym don satia ka jingsma kumba long ha marten hynrei kin shna ha kata ka rukom ba kin don ruh ki jaka shong pyngad.
La ïathuh ruh ba lada kitei ki pilot project ki seisoh, kin sdang ruh kylleng ki bynta jong ki 5 tylli ki distrik kiba hap ha u pud u sam jong ka Council.
“Lada kine ki Centre ki lah ban treikam bha bun kin ym donkam shuh ban wan shaduh marten ban theh ïa ki jaboh jabain namar ka jaka leit theh ka la don tang ha ki shnong jong ki,” u la bynrap shuh shuh.
U CEM u la ong ruh ba kim kwah shuh ba yn dang mih shuh sa ar ne lai tylli ki marten hynrei katba lah kin trei borbah ban peit ba ka rukom bret ïa ki jaboh jabain kan long kaba wanrah pynban ïa ka jingmyntoi ha ka jaka ka jingsma iwtung kaba pynkhñium ïa ki nongshong shnong kiba sah sawdong.
“Kum ki nongmihkhmat ngi don ka jingkitkhlieh bad ngi don ruh ka bynta kaba khraw ban ïatrei shitom bad nga kyntu ruh baroh 30 ngut ki MDC ba kin trei lang kawei ka bor kawei ka buit namar kane kam dei ka kam tang jong ka Executive Committee hynrei kadei ka kam jong ka Council hi baroh kawei na bynta ka jingkhuid jingsuba ha ki san tylli ki distrik.
Watla na ka liang ki heh ka World Bank kim treh ban kren ei ei hynrei u CEM u la ïathuh ba ki la pynpaw ka jingsngewkmen ba ha Ri Khasi ka jingleh khuid leh suba ka la don lypa ha ki shnong ki thaw bad ki ïing ki sem ha kaba ki la pynpaw ba kaba sah ka long satang ban pynjanai.