Pyrshah ki nongsynshar shnong ba thmu pynkynriah ka Sorkar ïa ka Marten sha Nonghali

Shillong, Risaw, 10: Ka Synjuk ki Nongsynshar Shnong Par Umkhen, kaba hap ha ki lai tylli ki distrik, kata, ka East Khasi Hills, ka Ri-bhoi bad ka West Jaiñtia Hills kiba pynpaw ïa ka jingpyrshah kaba jur halor ka jingthmu jong ka tnat Pynroi Sor ka Sorkar Jylla ban pynkynriah ïa ka Marten na Mawiong sha u Lumsohlait ha ka shnong Nonghali.
Ka Synjuk ka la shim ïa kane ka rai ha ka jingïalang jong ki nongsynshar shnong ka Par Umkhen kaba la long ha ka sngi Saitjaiñ jong ka taiew baladep.
Ha u kyrwoh khubor, ka Synjuk ka la dawa ïa ka tnat Pynroi Sor ba ka dei ban pynsangeh noh mardor ïa ka jingthmu ban pynlong ïa ka jingpynsngew paidbah (Public Hearing) bad maham ruh lada ka Sorkar ka ïaid pyrshah ïa ka mon jong ki paidbah na ki 20 tylli tam ki shnong kiba hap hapoh ka Par Umkhen kin pynlong da ki jingïakhih kiba tyngeh.
“Ngi dap da ka jingsngewkhia kaba khraw hadien ba ngi la ïoh jingtip ba ka Sorkar Jylla lyngba ka tnat Pynroi Sor ka la don ka jingthmu ban pynkynriah noh ïa ka Marten na Mawiong sha ka shnong Nonghali ha u Lumsohlait,” la ong ka Synjuk.
“Ki shnong kiba pyndonkam ïa ka wah Umkhen, ngi dap da ka jingsngewkhia namar katkum ka jingtip kaba shai lyngba ki dkhot kiba la poi ha kane ka jaka bad kiba la leit peit ïa kato ka jaka ki ïathuh ba ka jaka (ban pynlong jaka thehniut) ka don ha syndah jong ka Wah umkhen. Haduh mynta mynne, ki don ki nongshong shnong hapoh ka Par Umkhen kiba shong ha syndah jong ka Wah Umkhen ki pyndonkam ïa ka um ban rep ban riang bad ban sum ban sait, wat ban dih ruh ki pyndonkam ïa ka Umkhen,” la bynrap ka Synjuk.
“Ngi ïohi ba kane ka jingthmu jong ka Sorkar ban wanrah ïa ka Marten sha Nonghali kan ktah haduh katta katta ïa ki shnong kiba marjan,” ong ka Synjuk.
Ha ka jubab ba ka Synjuk ka la ïoh na ka Sorkar Jylla, la ïathuh ba ka tnat Pynroi Sor ka la pynkhreh ïa ka Environemental Impact Assessment (EIA) bad ïa ka Environmental Management Plan (EMP). Ka Sorkar ka dang don mynta ha ka jingpynkhreh.bad lada ngi peit pat ïa ka jingthmu ngi ïoh ba mynta ki thmu ban wanrah beit ha Nonghali. Kane kan ktah ïa ka Umkhen kaba ngi pyndonkam lut baroh..
Ka Synjuk ka la rai ban phah da ka jingthoh sha sha u Symbud Myntri Rangbah ka Jylla u Bah Sniawbhalang Dhar uba peit ruh ka tnat Pynroi Sor ban pynkut noh shisyndon ïa ka jingthmu ban wanrah ïa ka Marten ha Nonghali.
Shuh shuh ka Synjuk ka la shim ïa ka rai ban pynlong ïa ka jingïalang paidbah jong ki shnong kiba kynthup ïa ki 20 tylli tam ki shnong ba pyndonkam ïa ka Wah Umkhen ban pynpaw ïa ka jingpyrshah jur ïa ka jingthmu jong ka Sorkar.