Shillong, Risaw 10 : Ki Nongrep ka Shnong Lapangap, ki la sdang ban leit ot kba bad hiar sha la ki pynthor ban kheit ïa u soh ka jingtrei shitom ha ryngkat ka jingpahara kaba khlaiñ jong ki bor Pulit.
Ki Nongrep kane ka Shnong khappud ka West Jaintia Hills bad West Karbi Anglong, mynta ka sngi Ba-ar, ki la hiar ot ïa u kba ba ki la rep hapoh ka shnong Liariongskai, Lapangap, kaba dei ka jaka ba mih ka thma ïasiat jri bad khnam ryntieh hapdeng ki Nongshong shnong ka thaiñ (Khasi-Pnar) bad ki Karbi.
ïa kane ka jinghiar ot kba ki nong Lapangap, la synran da ki bor pahara kiba khlaiñ jong ki Pulit ka Meghalaya bad ki Pulit ka Assam ruh kumjuh, ban pynthikna ba kam dei ban don ka jingpynthut ïa ki nongrep.
Lashai ka sngi Balang, ka jingïa ot kba kan long ha ki hali ki pynthor kiba don ha ka shnong Nangjrong, kaba don marjan ka shnong ki Karbi ba la tip kum ka Tahpat.
Ka jingïakynad kaba jur bha hapdeng ki Khasi-Pnar bad ki Karbi ka la mih ha ka shnong Lapangap namar ka jingïakam trai ïa kawei ka jaka ha ka thaiñ. Ka jingïakynad ka la mih tang namar ka jingleit thung symbai dieng jong ki paid Khasi-Pnar ha Loom Moopyrdet bad Loom Pdeinphniar kaba hap ha Lapangap.
Ka jingïakynad ka la khie puk ha ka 25 tarik Nailur, kaba la poi sha u pud ka jingïaleh ban ïasiat da ki jri bad u khnam ka ryntieh, kaba haduh lai sngi kynthih.
Ki bor District ka West Jaintia Hills bad West Karbi Anglong ki la lum ïa ka jingïalang ba kyrkieh ha ka 28 tarik ban tem ïa kane ka jingïakynad, kaba la wan ïashim bynta da ki kynhun na Karbi Anglong bad na Lapangap.
ïa ki bor District ka West Jaintia Hills la ïalam da u Deputy Commissioner BS Sohliya bad u Superintendent of Police Bah C Syrti katba ïa ka West Karbi Anglong la ïalam da ka Deputy Commissione kar Krishna Baruah bad u Superintendent of Police .
Namar ba la poi ka aiom ot, kine ki bor District ki la shim rai ban ai ïa ki bor pahara ïa ki paid nongrep ka Lapangap ba kin leit ot ïa u kba ba ki la rep shitom baroh shikatta.
Ha kane ka jingïalang, ki paid Karbi ki la buh kyndon ïa ki paid Khasi-Pnar ka shnong Lapangap ba lada ki kwah ban ïoh leit ot ïa u kba na ki pynthor, ki dei ban jynrat shwa ïa baroh ki symbai dieng ba la thung ha Loom Moopyrdet bad loom Pdeinphniar.
